Membru Unidade Polisia Maritima (UPM) ho ró maritima buka-tuir mate-isin na’in-rua ne’ebé mout iha tasi. Imajen/Jully Centro.

DILI, 25 maiu 2021 (TATOLI)—Família koordena ho Unidade Polísia Marítima (UPM), Forsa Navál, FALINTIL Forsa Defeza Timor-Leste (F-FDTL), hodi hapara prosesu buka-tuir, mate-isin Nour Soares (18) no Francisco Lopes, ne’ebé mout ho ró Adewa-01 bainhira viajen hosi Dili ba Ataúoro, iha sábadu (14/05).

Administradór postu administrativu Ataúro, Mateus Belo, informa desizaun hapara buka-tuir mate-isin tanba, liu ona loron hitu (7), signifika sira-nia isin-lolon mout-lakon ona.

Notísia relevante:UPM-Navál kontinua buka mate-isin Nour ho Fransisco

Administradór ne’e esplika, normalmente predisaun povu Ataúro ne’ebé moris no fiar ba natureza ho kultura tasi, katak, bainhira ema ida mate iha tasi laran, ninia-isin loloos bele namlele iha tasi leten ho durasaun tempu loron haat de’it, no liu ona loron hitu, mate isin bele mout fali ba tasi-laran.

“Desde kedan sábadu (14/05) to’o agora, família ho komunidade Ataúro, koopera ho UPM no forsa Navál, esforsu buka-tuir mate-isin la hetan. Tanba ne’e, família deside hapara buka mate-isin,” Mateus Belo hateten ba jornalista Agência Tatoli via telefónika, tersa ne’e.

Nia esplika, família-sira mós halo kedan serimónia ritual, bolu hikas matebian na’in-rua nia-klamar, hodi foti fatuk tau ba rate nu’udár símbolu reprezenta matebian na’in-rua nia illas, liu hosi serimónia funerál iha semitériu Ataúro.

“Prosesu buka mate-isin hapara ona iha sesta (21/05) no domingu (23/05), familia sira hala’o serimónia funebre simbóliku hodi lori ai-funan no lilin ba tau iha tasi no simitériu,” nia hateten.

Matebian Francisco Lopes, orijen hosi suku Welaluhu, munisípiu Manufahi, durante tinan barak moris iha Ataúro no kaben ho Sanpira Soares ne’ebé oras ne’e iha oan na’in-lima.

Entretantu, matebian Nour Soares (18) orijen hosi suku Beloi, postu administrativu Ataúro, nu’udár família no rian hosi matebian Francisco Lopes.

Autoridade masimu Autúro ne’e mós agradese ba esforsu Komandu UPM no Forsa Navál inklui apoiu hosi Governu uza elikópteru ne’ebé koopera ho komunidade konsege hetan mate-isin na’in-rua no salva vitima na’in-tolu ne’ebé hetan ho kondisaun sei moris.

Antes ne’e, Komandante UPM, Superintendente Asistente, Basílio de Jesus, rekoñese laloran tasi makaas afeita mós ba forsa konjunta hodi buka-tuir mate-isin.

Komandu UPM rasik to’o agora seidauk bele autoriza abitante Ataúro halo movimentu ba mai, tanba laloran tasi sei kontinua boot.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here