Eis Prokuradór Jerál Repúblika, José da Costa Ximenes. Imajen Tatoli/Egas Cristovão.

DILI, 25 maiu 2021 (TATOLI)—Eis Prokuradór Jerál Repúblika (PJR), José da Costa Ximenes, hato’o  agradesimentu ba Governu ne’ebé iha kooperasaun di’ak ho Ministériu Públiku (MP), durante mandatu periúdu dala-rua.

“Maski antes ne’e hakerek ona karta agradesimentu, maibé, ohin hetan oportunidade hala’o enkontru ho Primeiru Ministru, hodi hato’o dala ida-tan, ami-nia agradesimentu ba kooperasaun instituisionál ne’ebe iha, entre PJR ho Governu,” José da Costa Ximenes, hateten ba jornalista-sira, hafoin sorumutu ho Primeiru Ministru (PM), Taur Matan Ruak, iha rezidénsia Faról, tersa ne’e.

Notísia relevante:PJR foun fó prioridade ba kombate korrupsaun iha Timor-Leste

José da Costa Ximenes informa, rekoñese katak, durante mandatu iha kooperasaun di’ak tebes, relativamente ho aprovasaun kuadru pesoál ofisiál justisa, ne’ebé foin publika iha 28 abrál.

Alende ne’e, alterasaun ba  kuardu pesoál ba majistradu Ministériu Públiku ho sira-seluk tan, iha ámbitu kooperasaun entre PJR ho Governu.

Nia mós fiar katak, ho lideransa PJR foun Alfonso Lopez, sei kontinua mantén kooperasaun di’ak ho Governu.

José Ximenes informa, durante enkontru Primeiru Ministru kompromete katak, Governu kontinua halo kooperasaun ne’ebé di’ak ho PJR nu’udár mós instituisaun Estadu ho papél nu’udár na’in ba asaun penál hodi defende interese Estadu.

José da Costa Ximenes, assume knaar nu’udár Prokuradór Jerál Repúblika (PJR), ho mandatu dahuluk iha tinan 2013 to’o 2017, no mandatu daruak iha 2017 to’o 28 abríl 2021.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here