Diretór Ezekutivu CNC, I.P, Hugo Maria Fernandes. Imajen TATOLI/Joanico de Araújo

DILI, 25 maiu 2021 (TATOLI)—Centro Nacional Chega, Institutu Públiku (CNC, I.P) atualiza progresu serbisu no programa iha trimestre dahuluk tinan ne’e, ba Primeiru-Ministru (PM), Taur Matan Ruak.

Diretór Ezekutivu CNC, I.P, Hugo Maria Fernandes, hateten, institutu ne’e tutela direta ba Gabinete PM, tanba ne’e enkontru ohin hanesan regulár.

“Programa ne’ebé CNC halo mak kontinua aliña ho polítika VIII Governu konstitusionál, liuliu haree oinsá kontinua prezerva memória pasada sira, ne’ebé institutu halo ona liuhosi peskiza istóriku, dijitalizasaun arkivu istóriku no mapamentu ba fatin istóriku sira,” Diretór Ezekutivu CNC, I.P, relata hafoin enkontru ho PM, iha Rezidénsia Farol, tersa ne’e.

Aleinde ne’e, CNC iha semana kotuk halo parseria ho país afrikanu ho lian ofisiál portugés (PALOP, sigla portugés) inklui Portugal, atu halo peskiza ida hanaran ‘rezisténsia nu’udar afirmasaun kulturál’, ne’ebé projetu ne’e sei realiza ho durasaun tinan-tolu.

Nune’e mós, hetan apoiu hosi Uniaun Europeia no Instituto Camões, atu halo peskiza iha Timór no sei halo aprezentasaun.

Iha semana kotuk, institutu halo akordu finanseiru ho KOIKA ho montante millaun $5, ba implementasaun programa durante tinan-haat.

“KOIKA finansia programa tolu hanesan dijitalizasaun arkivu no reabilitasaun sentru arkivu, no atu halo Timór hanesan sentru ba edukasaun dame no programa ikus mak halo mós programa interkámbiu kona-ba konflitu, rekonsiliasaun iha Timór,” nia akresenta.

Iha tinan kotuk, CNC kolabora ho Ministériu Edukasaun Juventude no Desportu (MEJD) hodi integra kontíudu relatóriu Chega! ba kuríkulu Siénsia Sosiál, Istória Jeografia, iha Eskola Sekundária terseiru siklu.

Notísia relevante: CNC-MEJD sei enkaixa konteudu “Chega!” ba kuríkulu ensinu nian

“Iha tinan 2021 ne’e komesa halo avaliasaun ba kuríkulu matéria hanesan ba segundu siklu nian,” nia hatutan.

Biban ne’e, PM orienta Diretór CNC atu halo ajustamentu ba programa, tanba tinan ne’e hasoru situasaun COVID-10, ne’ebé halo programa barak mak labele realiza iha munisípiu sira.

“Entaun tenke halo ajustamentu nune’e iha fulan-juñu bele halo revizaun oituan ba orsamentu,” nia tenik.

Institutu ne’e halo mós parseria ho Sala Situasaun-Sentru Integradu Jestaun Krize (SS-CIGC, sigla potugés) no Ministériu Saúde (MS) hodi halo ajustamentu balun.

“Hanesan ita hotu hatene ospitál Lahane nu’udar sítiu istóriku, maibé daudaun uza ba sala izolamentu COVID-19, tanba ne’e presiza halo ajustamentu balun atu halakon natureza nu’udar fatin istóriku ospitál nian,” Diretór Ezekutivu realsa.

Iha trimestrál dahuluk CNC hetan transferénsia gosi Gabinete PM hamutuk $720.000, ne’ebé ezekusaun to’o iha segunda (24/05) atinje $270.000 (seidauk to’o 50%).

“Situasaun ne’ebé impede ezekusaun tanba la halo mobilizasaun, CNC nia atividade barak iha munisípiu, maibé ho implementasaun Serka Sanitária labele halo deslokasaun. Tanba ne’e maka Xefe Governu husu iha fulan-juñu tenke halo alterasaun programa no orsamentu atubele ezekuta di’ak liu,” nia esplika.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here