Xefe Suku Samalari, Sorteiro Sequiera Magno. Imajen/Osória Marques.

DILI, 25 maiu 2021 (TATOLI)—Governu liuhosi Ministériu Administrasaun Estatál (MAE) liuhosi ekipa Sekretáriadu Tékniku Programa Nasionál Dezenvolvimentu Suku (PNDS) ne’ebé konklui ona idenfikasaun ba benefisiáriu ba “Uma Kbiit Laek” ne’e, ekipa identifika benefisiáriu na’in-tolu (3) iha suku Samalari-Baucau Vila mak elejível ba konstrusaun ba “Uma Kbiit Laek”.

Notísia Relevante: MAE hahú rekolla dadus benefisiáriu elejível ba uma kbiit laek

“Ha’u-nia Suku Samalari rasik identifika ona benefisiáriu ba Uma Kbiit Laek (UKL) hamutuk tolu iha aldeia Festau,” Xefe Suku Samalari, Postu Administrativu Baucau Vila, Munisípiu Baucau, Sorteiro Sequeira Magno hateten ba Agência Tatoli liuhosi telefónika, segunda ne’e.

Benefisiáriu tolu ba Uma Kbiit Laek ne’e, nia dehan, presiza duni tulun hosi Governu tanba sira-ne’e prenxe duni rekezitu ne’ebé Governu liuhosi Programa Nasionál Dezenvolvimentu Suku (PNDS) iha.

“Benefisiáriu sira-ne’e, ida ho kondisaun defisiénsia, ida tan mak ita-nia inan feto-faluk ida ho nia oan na’in-rua (2) maibé forma família ona entaun Governu hamutuk ho suku deside hili nia tanba nia hela mesak no presiza duni tulun hosi Governu. Benefisiáriu ida seluk mós feto-faluk ho oan na’in-hitu (7),” nia haktuir.

Nu’udar autoridade lokál, nia parte ba vizita iha aldeia Festau katak benefisiáriu sira-ne’e laiha duni kbiit hodi moris ho kondisaun faluk no defisiénsia, tanba ne’e suku deside hodi sira na’in-tolu (3) mak sai benefisiáriu ba konstrusaun Uma Kbiit Laek ne’e.

“La’ós benefisiáriu tolu ne’ebé iha aldeia Festau de’it mak hetan Uma Kbiit Laek ne’e maibé seluk mós sei hetan maibé hein opurtunidade tuir mai,” nia dehan.

Kona-ba osan ba konstrusaun UKL ne’e, nia dehan kada uma ida hetan $17.000 maibé kompleta ona ho nia fasilidade uma-laran nian, no bainhira implementa konstrusaun Uma Kbiit Laek ne’e sei involve ekipa task force hosi suku Samalari.

“Ha’u rasik mak sai Koordenadór ba ekipa task force ba implementasaun Uma Kbiit Laek ne’e inklui ho konsellu suku, xefe aldeia Festau rasik, afisiál polisiamentu suku (OPS) nian, veteranu, profesór ida no hosi relijiozu balun ne’ebé ekipa task force sira-ne’e sei hetan insentivu,” nia dehan.

Notísia Relevante: Implementasaun konstrusaun “Uma Kbiit Laek” ho pakote millaun $34

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here