DILI, 24 maiu 2021 (TATOLI)–Timor-oan iha Oxford, Inglatera realiza misa agradesimentu iha ámbitu Restaurasaun Independénsia da-19, iha loron 20 maiu, iha Igreja Corpus Christi R C, Headingtong, ne’ebé prezide hosi Padre The Rev, Canon Mervyn Tower.

Iha omília, Amu konvida timo-oan sira hodi hasa’e orasaun ba maluk ne’ebé iha Timor-Leste tanba tinan ne’e hasoru difikuldade rua hanesan luta kontra COVID-19 no dezastre naturál iha fulan kotuk.

“Ita kontinua reza nafatin ba sira ne’ebé envolve iha serbisu apoia vítima dezastre naturál, hodi fó tulun ba sira ne’ebé presiza no ita mós sempre reza ba Timor-Leste atu hela ho dame,  justisa, domin no sosiedade ne’ebé sagrada,” refere nota ne’ebé Agência TATOLI asesu, segunda ne’e.

Notísia relevante: Governu kansela selebrasaun loron restaurasaun 20 maiu

Amu Canon Mervyn mós husu timor-oan sira iha estranjeiru, atu halo momentu silénsiu ida hodi reza espesialmente ba fámilia ne’ebé lakon durante situasaun kalamidade.

Iha fatin Juvinal Bere Da Costa hamutuk ho Cecília Joana Soares, ne’ebé ajuda sesaun liturjia iha igreja, ho esperansa katak ho orasaun sira, Maromak sei tau matan no fó bensaun nafatin ba rai lulik Lafaek no nia emar.

Nune’e mós, Helder Costa, hateten, intensaun atu komemora loron Restaurasaun Independénsia da-19 liuhosi misa agradesimentu ne’e atu fó onra ba heroi da pátria sira ne’ebé fó vida tomak ba libertasaun to’o hetan independénsia.

“Ita-nia rai hetan libertasaun no ohin loron koñesidu iha mundu tomak ho naran Repúblika Demokrátika Timor-Leste (RDTL),” nia akresenta.

Kada tinan timor-oan sira iha estranjeiru sempre selebra loron Restaurasaun Independénsia ho atividade oin-oin hanesan kultura, múzika no jogu amizade ou torneiu 20 maiu.

Torneiu 20 maiu dahuluk halo iha sidade Peterborough, tuir mai iha Northwich no tinan 2019 iha Oxford, ne’ebé konsege halibur kuaze timor-ona hamutuk 1.800.

Iha tinan 2020, Irlanda Norte mak sai uma na’in ba eventu komemorasaun loron istóriku ne’e.

Selebrasaun loron Restaurasaun Independésia hanesan mós iha Timor-Leste ho atividade barak, maibé iha komemorasaun 20 maiu 2021 la realiza tanba situasaun pandemia globál ne’ebé seidauk fila ba situasaun normál.

Timor-oan iha sidade Peterborough, liuhosi asosiasaun desportiva Timorense-UK, atu hala’o mini turnamentu hodi komemora loron Restaurasaun Independénsia RDTL, maibé la realiza tanba situasaun atuál.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here