Sentru izolamentu Vera Cruz. Imajen Tatoli/Egas Cristóvão.

DILI, 24 maiu 2021 (TATOLI)—Sala Situasaun, Sentru Integradu Jestaun Krize (SIJK) entrega mate-isin na’in-rua ba família, hodi haloot tuir tradisaun Timor-Leste, maibé kumpri protokolu Ministériu Saúde (MS) no Organizasaun Mundiál Saúde (OMS).

Mate-isin na’in-rua ne’e feto hotu, ida idade 73 no ida seluk 52. Na’in-rua ne’e, ida hakotu-iis iha 22 maiu no ida seluk hakotu-iis iha 23 maiu 2021 ho COVID-19.

Notísia relevante:COVID-19: pozitivu 179, rekoperadu 120 no ativu 2.601

Matebian-sira, durante ne’e hala’o tratamentu iha Hospitál Nasionál Guido Valadares (HNGV sígla portugés), ida sofre moras isin-manas, mear maran no iis-boot, ida seluk ho istória moras diabetes,  tensaun aas,  no rezultadu teste swab hatudu matebian na’in-rua mós pozitivu COVID-19.

Ida ho naran Francisca Gusmão hosi munisípiu Bobonaro ne’ebé tuir planu sei haloot iha nia rai moris fatin no Mariana Ximenes hosi munisípiu Manufahi sei halot iha semitériu públiku Rai-kotu.

“Ha’u-nia inan moras estómagu de’it, ne’ebé ami fó ai-moruk de’it hodi hemu iha uma, maibé ikus-mai ami senti ladún di’ak, nia iis boot entaun ami lori ba HNGV. Iha ne’ebá halo ezame saúde hetan moras komplikasaun hanesan raan midar, sofre kurasaun no nia pulmaun mós bubu ona. Nune’e, doutór-sira teste swab ho rezultadu pozitivu COVID-19, sira lori mai iha sala izolamentu Vera Crus,” Evangelista Ximenes, oan hosi matebian Mariana Ximenes, hateten ba jornalista sira iha Vera Cruz, segunda ne’e.

Reprezentante ekipa Pillar VI, Evaristo Soares, informa,  ekipa ida-ne’e responsaliza hodi asegura medida prevensaun tuir padraun OMS no asegura ekipamentu protesaun pesoál,  nune’e virus labele da’et ba ema seluk.

Tanba ne’e, ekipa ne’e koordena ona ho família kona-bá prosesu haloot mate-isin na’in-rua, ne’ebé iha konkordánsia sei obedese ba  regra OMS no MS.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here