Vise-Prezidente Parlamentu Nasionál, Maria Angelina Lopes Sarmento. Imajen Tatoli/Egas Cristóvão

DILI, 24 maiu 2021 (TATOLI)—Durante tinan barak Timor-Leste dependénsia maka’as ba fundu minarai, maibé ho aprovasaun projetu-lei kódigu mineiru marka importante ida tanba ba futurtu sai nu’udar alternativa ba dezenvolvimentu ekonomia nasaun nian.

Deputada Bankada Partidu Libertasaun Populár (PLP), Maria Angelina Lopes Sarmento, konsidera projetu-lei ne’ebé parlamentu aprova ho unanimidade ne’e marka importante ida ba Timor-Leste tanba sei regula rikusoin minerál ne’ebé Timor-Leste iha.

“Ita hahú ona ho kódigu mineiru ida-ne’e mak loke dalan ba ita atu halo esplorasaun ba ita-nia rikusoin sira. Rikusoin minerál mós sei lori reseita no retornu boot ba povu ida-ne’e no povu ida-ne’e mak hetan benefísiu ekonómiku hosi mineiru ka minerál ne’ebé Timor-Leste iha,  ne’e nu’udar alternativa ba dezenvolvimentu ekonomia nasaun nian iha futuru,” Vise-Prezidente Parlamentu Nasionál ne’e levanta liuhosi plenária, segunda ne’e.

Entretantu, Deputadu Bankada Partidu Demokrátiku (PD), Adriano do Nascimento, espera parlamentu no Governu bele aprova tán projetu-lei ba fundu mineiru nune’e kompleta lei kódigu mineiru ne’e.

“Ita hein iha implementasaun, tanba lei rua ne’e importante ba Timor-Leste,” nia dehan. 21:46:27

 Purtantu, Deputada Bankada Frente Revolusionária Timor-Leste Independente (FRETILIN), Lídia Norberta dos Santos Martins, hateten dezde povu ida-ne’e restaura independénsia iha 2002 to’o oras ne’e foin mak iha lei kódigu mineiru.

“Ita haree iha rai barak ne’ebé rikusoin minerál sira la regula ho lei kódigu mineiru ne’e, akontese problema barak. Ezemplu hanesan Angola akontese kazu hanesan, entaun lei ida-ne’e di’ak tebes tanba bele responde Estadu nian no mós sidadaun sira-nian,” Sekretária Meza PN ne’e akresenta.

Notísia Relevante: PN aprova projetu-lei kódigu mineiru ho unanimidade  

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here