Produtu Cesta Bázika iha bote Imajen TATOLI/Antónia Gusmão

DILI, 24 maiu 2021 (TATOLI)—Xefe Suku Caicoli, Postu Administrativu Vera Crúz, Munisípiu Dili, Hipólito Marques Sarmento, hatete reklamante 16 hosi Suku Caicoli mak to’o agora seidauk simu Cesta Bázika.

Notísia Relevante: Suku Caicoli rejista reklamasaun Cesta Bázika 74

“Kona-ba Cesta Bázika, ami Suku Caicoli iha xefe família hamutuk 16 mak tama ba lista reklamasaun nian, maibé ha’u seidauk hatene bainhira mak ita-nia Governu atu fahe tan. Ita hein de’it parte relevante sira,” Xefe Suku Caicoli hateten ba Agência TATOLI, liuhosi telefónika, segunda ne’e.

Autoridade lokál ne’e hatutan, nia parte fiar no iha esperansa katak sira-ne’ebé tama iha lista reklamasaun ne’e sei simu Cesta Bázika iha loron ruma, tanba ne’e nia husu ba komunidade hein de’it desizaun hosi Governu.

“Ha’u hanoin ita-nia maluk ne’ebé tama iha lista reklamasaun ne’e sei simu tanba ita iha esperiénsia ida mak reklamasaun ba subsídiu $200 uluk, ita hein kleur maibé depois reklamante sira konsege simu duni sira-nia direitu. Nune’e, ha’u hanoin sira sei simu,”  nia dehan.

Hosi reklamante 16 ne’e maihosi aldeia Zero Um (01) iha haat (4), aldeia Zero Dois iha rua (02), aldeia Zero Três (03) iha rua (2), aldeia Zero Kuatru (04) iha haat (4) no aldeia Zero Cinco (05) iha haat (4).

Ho reklamasaun sira ne’e, Xefe Suku Caicoli husu atu ema hotu-hotu hein de’it desizaun hosi Governu tanba populasaun iha Timor-Leste barak mak seidauk simu Cesta Bázika ne’e.

“Bainhira desizaun sai ona katak atu simu, ha’u sei informa ba reklamante sira no ba xefe aldeia sira,” nia hateten.

Antese ne’e, Suku Caicoli rejista reklamasaun ba Cesta Bázika hamutuk xefe família 74 maibé tanba hosi reklamante hirak ne’e barak mak fila tiha ona ba sira-nia moris fatin (foho), entaun autoridade lokál fó de’it konsiderasan ba reklamante xefe família 16 ne’ebé oras ne’e hela iha Dili.

Notísia Relevante: Aldeia tolu iha suku Caicoli seidauk simu Cesta Bázika

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here