Atividade iha sala plenária Parlamentu Nasionál. Imajen TATOLI/António Gonçalves.

DILI, 24 maiu 2021 (TATOLI)—Parlamentu Nasionál liuhosi Komisaun D ne’ebé trata asuntu ekonomia no dezenvolvimentu, rekomenda ba Governu atu estabelese regra ba investimentu kapitál umanu atu nune’e bele kesi-metin bolseiru sira.

“Komisaun D rekomenda Governu atu tau konsiderasaun hodi estabelese regra ba iha investimentu kapitál umanu, atu nune’e kesi kesi-metin liután wainhira bolseiru sira termina estudu fila mai sei la sees ba iha fatin seluk,” Sekretáriu Meza Komisaun C, Deputadu Alexandrino Cardoso da Cruz lee sai relatóriu fiskalizasaun hosi Komisaun D, lideradu Deputadu Antoninho Bianco bainhira aprezenta relatóriu fiskalizasaun polítika ba plenária, segunda ne’e.

Relatóriu Komisaun D nian akresenta, Fundu Dezenvolvimentu Kapitál Umanu (FDCH-sigla portugés) ne’ebé iha rekursu umanu lubuk ida iha Timor Gap, Autoridade Nasionál Petróleu no Minerál (ANPM) no Institutu Petróleu no Jeolojia (IPG-sigla portugés) ne’ebé finánsia hosi FDCH nomoos balun hosi parseiru dezenvolvimentu sira.

Maibé bolsu estudu hosi Ministériu Petróleu no Minerál (MPM) nian mak iha anteriór haruka ona na’in-35 ba kursu espesializada sira iha Malázia durante tinan rua liga ba iha indústria petróleu no gás ne’ebé sira konklui ona formasaun no iha balun servisu ona no balun seidauk.

Deputadu Alexandrino hateten, liga ba formasaun pilotu iha pesoál na’in-haat ne’ebé mak anteriór seidauk termina formasaun, tanba empreza ne’ebé mak uluk fó formasaun ne’e bankarota tiha ona, entaun agora ministériu hola responsabilidade hodi buka fali empreza seluk atu nune’e sira bele kontinua hodi kompleta sira-nia kursu.

FDCH aprova hosi Parlamentu Nasionál liuhosi Lei númeru 1/II iha loron 14 fevereiru, artigu 9 kona-ba OJE 2011 bazeia ba artigu 32 Lei númeru 13/2009, 21 outubru (LOGF) ne’ebé ko’alia kona-ba kriasaun FDCH.

FDCH regula liuhosi Dekretu-Lei foun númeru 13/2020, 15 abríl, kona-ba Regulamentu “Fundo de Desenvolvimento do Capital Humano” no bazeia ba artigu 4 jestaun fundu nian kabe ba Konsellu Administrasaun haktuir liña jerál ba polítika governamentál.

Bazea ba livru 6 (Fundu Espesiál-FDCH), ne’ebé Agência TATOLI, asesu liuhodi súmariu alokasaun orsamentu no despeza dezde 2011 to’o 2015, ne’ebé korresponde faze dahuluk implementasaun Planu Estratéjiku Dezenvolvimentu Nasionál (PEDN), hahu ho oferta ba bolsa Estudu no programa formasaun iha tinan 2011, tinan ba kriasaun FDCH ba instituisaun akreditadu iha FDCH.

Hahu hosi tinan 2011 to’o iha tinan 2015 totál orsamentu hamutuk millaun $178,532 ne’ebé maka alokadu ba fundu.

Hosi montante ida-ne’e, programa bolsa estudu hetan orsamentu ne’ebe boot hó valor millaun $86,727, reprezenta 48,6% hosi valór totál ne’ebé alokadu ba dezenvolvimentu rekursu umanu.

Tuir mai programa formasaun profisional hó valor totál millaun $40,282, reprezenta 22,6% hosi totál orsamentu, programa tipu formasaun seluk hó valór totál millaun $ 27,425, reprezenta 15% hosi orsamentu totál, programa formasaun téknika hó valor totál millaun $16,212, reprezenta 9% hosi orsamentu totál.

Programa asisténsia téknika ba setór judisiáriu no setór tersiáriu simu totál millaun $7,9, reprezenta 4% hosi totál orsamentu.

Nune’e programa bolsa estudu liuhosi FDCH nian hahú hosi tinan 2011 fó kontinuidade ba programa bolsa estudu ne’ebe mak eziste ona iha ministeriu sira hahú tinan 2008.

Programa ida-ne’e finánsia ona feto sira ho totál 1,991 (46%) no mane sira ho totál 2,321 (54%) hosi total 4,312 benefisiariu durante tinan 5 (lima). Programa ida-ne’e la’ós abranje de’it ba funsionáriu públiku sira maibé públiku ein-jerál. Durante tinan 5 (lima) ne’e, totál 1,978 bolseiru finaliza tiha ona sira-nia estudu no fila ona mai iha Timor Leste, no total 2,334 maka kontinua hela sira nia estudu.

Hosi tinan 2016 to’o 2019 programa bolsa estudu, iha instituisaun sanulu resin ha’at (14) maka iha programa bolsa estudu durante períodu tinan 2016 to’o 2019 ne’ebé abranje ona totál 1,231 benefisiariu ne’ebé sei ativu no sei kontinua hela sira-nia estudu, bolseiru sira-ne’ebé gradua ona ho totál 3,748, no bolseiru sira-ne’ebé sira-nia bolsa kanseladu ho totál 259.

Instituisaun sira ne’e, Ministériu Saúde (MS) no Ministériu Edukasaun (ME) maka aprezenta númeru bolseiru sira-ne’ebé boot liu. Relasiona ho igualdade jéneru, bolseiru mane sira reprezenta 53% kompara ho benefisiáriu feto sira ho 47%.

Entretantu programa bolsa estudu durante períodu janeiru to’o agostu 2020, totál bolseiru hamutuk 746 maka benefisia ona bolsa liuhosi FDCH. Husi total númeru ne’e bolseira feto hamutuk 275 no bolseiru mane hamutuk 471.

Notísia Relevante: FDCH ho IESPP-sira asina MoU apoia bolsa hakbiit ba benefisiáriu 910

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here