Imajen/Media PR.

DILI, 24 maiu 2021 (TATOLI)—Parlamentu Nasionál (PN) segunda ne’e aprova ona proposta alterasaun ba lei defeza nasionál iha finál globál.

Proposta-lei númeru 21/V (2a) ba lei defeza nasionál ne’e aprovadu ho rezultadu votasaun a-favór 39, kontra O no abstensaun 13.

Notísia Relevante: Semana oin, PN aprova proposta-lei defeza nasionál iha finál global

“Primeira alterasaun ba lei defeza nasionál aprovadu,” Prezidente Parlamentu Nasionál, Deputadu Aniceto Longuinhos Guterres Lopes, anúnsia liuhosi plenária.

Ministru Defeza Filomeno Paixão de Jesus, esplika iha proposta-alterasaun ne’e la hatama asuntu foun kona-ba komandante komponente sira.

“Iha-ne’e aumenta de’it mak Vise-Xefe Estadu Maiór, ne’ebé komandante komponente sira agora ne’e korresponde ba Xefe Estadu Maiór hosi ramu sira. Iha lei ida-ne’e iha komandante komponente iha na’in-tolu mak hanesan terrestre, navál no aéreu,” nia esplika.

Iha proposta-lei alterasaun ne’e komandante komponente sira ho diviza koronél, no ba futuru bele promove ba brigadeiru jenerál.

Prezidente Komisaun B, Deputadu José Agostinho Siqueira ‘Somotxo’ esplika iha proposta alterasaun dahuluk ba lei defeza nasionál ne’e hamutuk artigu 12.

Razaun Governu husu altera atu kondiz ho situasaun reál forsa armada nian. Razaun seluk Governu husu alterasaun tanba dezde 2010 la atualiza.

Prezidente Komisaun B ne’ebé trata asuntu Negósiu Estranjeiru, Defeza no Seguransa, Deputadu José Agustinho Siqueira ‘Somotxo, esplika Governu husu ba Parlamentu Nasionál atu altera artigu hamutuk 12 iha Lei Defeza Nasionál númeru 3/2010.

“Proposta-alterasaun ne’ebé Ministériu Defeza submete mai husu halo alterasaun ba artigu hamutuk 12 iha Lei Defeza Nasionál, atu deskute no iha loron tersa ne’e ami aprova ona iha espesialidade,” Prezidente Komisaun B ne’e informa.

Entretantu Governu liuhosi Ministériu Defeza propoin altera artigu 14, 18, 19, 20, 31, 32, 34 to’o 57 iha Lei Defeza Nasionál (lei númeru 3/2010).

Prezidente Komisaun B ne’e esplika, iha alterasaun ne’e mós previstu kompeténsia Prezidente Repúblika nain, Primeiru Ministru nia kompeténsia, membru governu ne’ebé tutela iha área defeza nia kompeténsia, Xefe Estadu Maiór Jenerál (CEMG-sigla portugés) nia kompeténsia, Vise-Xefe Estadu Maiór Jenerál (VCEMG-sigla portugés) nia kompeténsia no komandante komponente sira-nia kompeténsia.

“Tanba saida mak Prezidente Repúblika tenke nomea to’o komandante komponente sira, ne’e tanba atu prevee ba tempu naruk,” nia dehan.

Iha alterasaun ne’e atu uniformiza mós komponente tolu (3) iha Forsa Armada komposta hosi navál, terrestre no komponente ida sei mosu iha futuru mak aéreu.

“Komponente ne’e nia komandante ne’e la’ós hanesan kapitaun ida, maibé brigadeiru ida mak sei komanda, alterasaun ne’e loke dalan ba tempu naruk nian,” nia dehan.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here