Provedora Direitu Umanu no Justisa (PDHJ), Jesuína Maria Ferreira Gomes. Imajen Tatoli/ Egas Cristóvão

DILI, 24 maiu 2021 (TATOLI)—Provedoria Direitu Umanu no Justisa (PDHJ sígla portugés), Timor-Leste (TL), sei partisipa sorumutu virtuál asembleia jerál, International Ombusman Institute  (IOI),  ne’ebé sei realiza iha 25-27 maiu tinan ne’e.

“Enkontru ne’e sei ko’alia kona-bá ezbosu deklarasaun ho asuntu-sira seluk ne’ebé sei realiza iha asembleia jerál IOI nian iha Dublin-Irlandia,”Provedora PDHJ, Jesuina Maria Ferreira Gomes, hateten ba jornalista Agência Tatoli, segunda ne’e.

Notísia relevante:OJE 2021, PDHJ ezekuta ona 36.7%

Iha loron 20 maiu 2021, PDHJ mós partisipa enkontru virtuál IOI Asian Region Meeting Bangkok, ne’ebé organiza hosi Ombudsman Thailand, ho objetivu atu fahe ideia no troka esperiénsia liga ba dezafiu-sira ne’ebé membru-sira hasoru durante pandemia COVID-19.

Alende ne’e, ko’alia mós kona-bá rezultadu eleisaun estrutura IOI ba periúdu 2021-2024 ne’ebé antes ne’e hala’o ona, no aprezenta proposta revizaun ba estatutu IOI rejional Asia, ne’ebé  nasaun membru hanesan Tailándia, Japaun, Pakistaun, Macau-Xina, Indonézia, Republic of Corea, Filipina, Sri Lanka no Timor-Leste.

Nasaun membru ida-idak iha rejiaun Azia, hatama informasaun badak kona-bá dezenvovimentu iha tempu surtu COVID-19, nune’e sei haruka no aprezenta iha asembleia jerál IOI.

Nia hatutan, iha enkontru ne’e, la ko’alia espesifikamente ba situasaun pandemia, maibé ko’alia barak liu kona-bá mudansa estrutura iha Asia region no proposta alterasaun ba estatutu IOI nian.

Parte Timor-Leste liu hosi  PDHJ ne’ebé partisipa iha sorumutu ne’e halo komentáriu no husu esplikasaun kona-bá  ezbosu alterasaun estatutu IOI, ne’ebe sei halo votasaun iha asembleia jerál no mós asuntu relevante-seluk.

International Ombusman Institute (IOI), nia knaar instituisaun provedoria nian maka proteze povu hasoru violasaun direitu umanu, abuzu podér, desizaun ne’ebé la justu no  mal administrasaun sira.

Hala’o mós knaar importante ida atu hadi’a administrasaun públika,  halo Governu nia asaun-sira nakloke liután no nia administrasaun sai responsável liután ba públiku.

Institutu Internasionál ba Direitu Umanu (IOI-silga inglés), ne’ebé harii iha 1978, nu’udár organizasaun globál úniku, ne’ebé hala’o kooperasaun ho instituisaun independénsia liu 200 hosi nasaun 100 iha mundu tomak.

IOI ne’ebé organiza aan iha kapítulu rejionál neen hanesan ’Africa, Ázia, Austrália no Pacific, Europe, the Caribbean no Latin America ho North America, iha esforsu atu foka ba governasaun di’ak no kapasitasaun, fó apoiu ba ninia membru-sira ho maneira tripulasaun, formasaun, peskiza no subsídiu rejionál ba projetu-sira.

Timor-Leste sai membru IOI iha 2016  no sai mós membru ba AOA (Asian Ombudsman Association).

Vantajen ne’ebé PDHJ hetan durante ne’e nu’udár membru IOI maka, partisipa treinamentu, semináriu, iha área boa governasaun.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here