Osan Dolar Amerikanu. Imajen/Espesiál

DILI, 24 maiu 2021 (TATOLI)—Ministériu Asuntu Kombatente Libertasaun Nasionál (MAKLN), ezekuta ona 24% hosi Orsamentu Jerál Estadu (OJE) 2021 ho osan  hamutuk millaun $25 hosi montante $102.430.580. 

Notísia Relevante: Orsamentu MAKLN millaun $104,5 aprova iha espesialidade

“Ami-nia totál orsamentu ba 2021 nian hamutuk $102.430.580. Maibé gastu atuál ne’e $22.341.530,41 ho 22% no 2% ne’ebé ita gastu ba komitmentu obrigasaun iha $2.462.461,98 nune’e iha fulan janeiru-marsu tinan ne’e ami ezekuta osan hamutuk 24% ho osan hamutuk $24.803.992,47 (millaun $25),” Diretora Nasionál Administrasaun no Finansa MAKLN, Rosa da Costa Gomes, ba Agência TATOLI, liuhosi telefónika, segunda ne’e.

Hosi ezekusaun orsamentu ne’e, nia informa, MAKLN ezekuta ba saláriu vensimentu ho 23% ho montante $139.862,50, bens servisu 24% ho montante $1.675.206,85, kapitál menór 100% ho montante $328.550, transferénsia públiku 25% ho montante $22.660.373,12 no kapitál dezenvolvimentu zero hela.

Iha ezekuzaun OJE 2021 ne’e, MAKLN labele ezekuta tuir programa ne’’ebé sira trasa tanba dezafiu ida mak Timor-Leste hasoru pandemia COVID-19 no kalamidade klimátika (dezastre naturál) maibé MAKLN esforsu nafatin, atu nune’e bele ezekuta hotu.

“Ami iha dezafiu bainhira ezekuta orsamentu ne’ebé ita-nia Estadu prevee maibé ho situasaun COVID-19, entaun ita labele ezekuta hotu ba programa ne’ebé durante ne’e MAKLN trasa ona. Maibé ita sei esforsu hodi ezekuta no implementa programa ne’e. Pandemia COVID-19 ne’e mak impede ami labele la’o to’o munisípiu hodi ezekuta no implementa programa,” nia dehan.

Maibé, nia informa, tuir loloos ne’e kada semestre ida tenke ezekuta to’o 25% maibé MAKLN labele atinje tanba Estadu Emerjénsia (EE) ne’ebé Governu implementa Serka Sanitária no konfinamentu domisiliáru.

Kona-ba planu prioridade ba trimestre daruak, nia dehan, mak programa halo rejistrasaun kontinuasaun ba veteranu nian ba tinan 2009 nian ne’ebé paradu inklui programa identifika uma lisan, no mós programa ida mak fó bolsu estudu ba veteranu sira-ne’ebé mate no moris nia oan sira mós labele la’o to’o agora.

“Iha trimestre daruak, ami hala’o de’it mak pensaun ba veteranu sira-nian no programa ne’ebé ha’u mensiona iha leten ne’e labele la’o tanba situasaun COVID-19,” nia dehan.

Diretora ne’e esplika, Orsamentu Jerál Estadu (OJE) 2021 ne’e loloos hamutuk $104.521.000 maibé tanba iha sirkulár ne’ebé fó sai hosi Gabinete Ministériu Finansa iha 02 fevereiru, orienta atu kada membru Governu tenke identifika dotasaun orsamentál ho montante 7% hosi total orsamentu instituisaun, mak MAKLN deside fó orsamentu $2.090.000 atu transfere ba fundu COVID-19 hodi halo pagamentu despeza programa Cesta Bázika.

“Ami-nia orsamentu orijinál iha $104.521.000 maibé iha trimestre dahuluk ne’e ami transfere tiha $2.090.000 ba reforsa fundu COVID-19, entaun osan ne’e tún fali ba $102.430.580,” nia hateten.

Notísia Relevante: Orsamentu la tranzita, ko’a 7% kada ministériu apoiu Cesta Bázika

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here