Kondisaun uma iha área Ponte Comoro 3, Dili, ne’ebé hetan estragu hosi inundasaun ne’ebé akontese domingu (04/04/2021). Imajen TATOLI/António Gonçalves

DILI, 24 maiu 2021 (TATOLI)-Ministériu Finansa (MF) hamutuk ho parseiru dezenvolvimentu hanesan Programa Nasaun Unida ba Dezenvolvementu (UNDP, sigla Ingles) no Banku Dezenvolvementu Áziatiku (ADB, sigla Inglés), lansa inisiativa ba empregu emerjénsia hanaran ‘Hamutuk Serbí Komunidade’ ho objetivu atu estimula ekonomia lokál.

Programa ne’e introdús hosi Reprezentante hosi MF ne’ebé hanesan Diretór Jerál Jestaun no Mobilizasaun Rekursu Externu, António Freitas, hamutuk ho Reprezentante Rezidente UNDP, Tuya Altagerel inklui Koordenadór Rezidente ADB, Sunil Mitra.

Tuir nota ne’ebé Agência TATOLI asesu iha segunda ne’e, inisiativa ne’e hanesan resposta ba rekuperasaun dezastre naturál, ne’ebé sei fó oportunidade serbisu imediata ba ema hamutuk 5.000 iha aldeia identifikadu 50.

Entidade relevante sei serbisu hamutuk ho komunidade lokál atu hamoos foer, saneamentu, dalan no dreinajen bee ne’ebé nalihun atu prevene moras dengue no reparasaun infraestrutura bázika nesesária sira seluk ne’ebé urjente iha aldeia sira iha munisípiu Dili ne’ebé mak afetadu maka’as hosi inundasaun iha fulan kotuk.

Programa ne’e sei hahú implementa iha aldeia hitu, ne’ebé mak sai hanesan pilotu no lansa iha aldeia 03 Anin-Fuik, Aitarak Laran, suku Kampo Alor, postu administrativu Dom Aleixo, munisípiu Díli.

“Programa ne’e sei ajuda benefisiáriu apoia família no komunidade, liuhosi asaun kiik ne’ebé hanesan meiu rekuperasaun ida,” refere nota hos MF.

Iha biban ne’e, Reprezentante MF  hato’o apresiasaun ba UNDP no ADB inklui Governu Japaunn Koreia Súl, tanba apoiu jenerozu no solidaridade ba povu Timor-Leste iha tempu krize no prontu atu kolabora nafatin hodi dezenvolve no rekupera komunidade nia atividade.

Seremónia lansamentu ne’e partisipa hosi Vise-Ministru Administrasaun Estatál, Lino de Jesus Torrezão, Sekretáriu Estadu Formasaun Profisionál no Empregu, Alarico do Rosário, Embaixadór Japaun, Kinefuchi Masami, Embaixadór Repúblika Koreia Súl, Kim Jeong, inklui Koordenadór Rezidente Organisaun Nasaun Unida (ONU), Roy Trivedy no reprezentante sira husi Programa Ai-han Mundiál (WFP, sigla inglés), Organizasaun Internasionál Traballadór (OIT) no United Nations Volunteers (UNV).

Antes ne’e, iha 16 abríl 2021, Ministru Finansa, Rui Gomes no Koordenadór Rezidente ADB, Sunil Mitra, asina ona akordu subvensaun millaun $1 atu suporta programa ‘Apoiu Resposta Inundasaun no Rekuperasaun’ kauza hosi Siklon Tropikál Seroja, ne’ebé hamosu bee-sa’e no rai-halai iha Dili, inklui munisípiu seluk.

Atividade ne’e finansia hosi Fundu Resposta ba Dezastre Ázia Pasífiku liuhosi ADB, ne’ebé sei apoiu Governu Timor-Leste nia esforsu atu hadi’a serbisu salva-moris hanesan halo avaliasaun ba estragu, koordena serbisu responde ba krize, rekuperasaun dezastre, fornese ajudu ba komunidade no reabilita infraestrutura bázika komunidade.

Hahú hosi 29 marsu to’o iha 04 abríl, udan no anin-boot kauza hosi Siklon Tropikál Seroja, estraga ona komunidade sira-nia uma, toos, natar no infraestrutura bázika importante sira inklui liña eletrisidade no komunikasaun iha munisípiu ualu iha Timor-Leste.

Bazeia ba relatóriu hosi ONU, to’o iha 19 maiu 2021, totál uma-kain 33.835 mak afetadu hosi inundasaun, ho númeru mortalidade konfirmadu hamutuk 44.

Enkuantu, ema 1.700 mak temporariamente sei desklokadu iha sentru akollimentu 13 iha munisípiu Dili.

Hafoin deklarasaun Estadu Kalamidade iha Dili iha 08 abríl, Governu kontinua lidera resposta ba inundasaun no to’o ohin loron, Sekretaria Estadu Protesaun Sivíl (SEPS) fornese ona ai-han no sasán nesesidade bázika inklui sasán la’ós ai-han ba uma-kain afetadu hamutuk 12.197 iha munisípiu 12 inklui Rejiaun Administrativa Espesiál Oé-cusse Ambeno (RAEOA).

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here