IOB Timor-Leste

DILI, 24 maiu 2021 (TATOLI) – Ministériu Ensinu Superiór, Siénsia no Kultura (MESSK) konsidera  dadus estudante Institute of Business (IOB) nian atu hetan direitu ba injesaun propina no internet tenke verifika fali tanba fallansu hakerek númeru.

Notísia Relevante : MESSK sei haruka dadus estudante 63,523 ba MF

Diretora Jerál Ensinu Superiór-MESSK, Maria Filomena Lay Guterres, informa dadus hosi Instituisaun Ensinu Superiór Públiku no Privadu (IESPP)-sira seluk laiha problema, úniku dadus IOB nian mak tenke verifika tanba iha fallansu bainhira hakerek númeru estudante.

 “Ami haree montante númeru ne’ebé sira hakerek iha lista ne’e la kondís ho totál estudante ne’ebé iha, tan ne’e, ami  haruka sira verifika ho didi’ak.  Bainhira  loos ona bele submete fali mai ministériu,”  Maria Filomena Lay informa ba jornalista-sira iha edifísiu MESSK, Dili, segunda ne’e.

Prezidente Komisaun Asesu Engeresu Ensinu Superiór ne’e hateten, sira haruka fila dadus ne’e la’ós atu husu IOB atu hasai ka aumenta númeru ne’ebé hakerek ona, maibé presiza hadi’a fali númeru ho totál estudante tenke hanesan.

“Ha’u komprende buat ida liga ho númeru ne’e dala ruma falla, satan ligadu ho asuntu estudante ne’ebé barak kuandu ita la foku sempre hamosu fallansu,” nia hateten.

Iha sorin seluk, Vise-reitór IOB trata asuntu akademia no estudantíl, António Soares Martins, akresenta razaun MESSK husu IOB verifika fali dadus estudante ne’e tanba konsidera iha númeru balun mak laloos.

Nia informa dadus estudante IOB hamutuk  4.287 inklui mestradu na’in-150 ne’e mak submete ona ba MESSK, maibé sira konsidera dadus ne’e hakerek laloos.

“Aban ami nia Magnífiku Reitór interinu mak sei lori fali lista ba Ministériu atu apár fali ho sira nian, tanba antes ne’e ami hatama ona dadus ba sira. Dala ruma, sira mak la atensaun didi’ak ho númeru sira-ne’e,” António Martins hateten.

Jornalista       : Tomé Amado

Editór             : Francisco Simões

HAKEREK NO HATÁN

Please enter your comment!
Please enter your name here