Provedora Direitu Umanu no Justisa (PDHJ), Jesuína Maria Ferreira Gomes. Imajen Tatoli/Dok.

DILI, 24 maiu 2021 (TATOLI)—Provedoria Direitu Umanu no Justisa (PDHJ sígla portugés), kontinua fó formasaun direitu umanu no kna’ar Polísia Nasionál Timor-Leste (PNTL) ba membru hotu-hotu, atu bele aumenta koñesimentu, hodi bele hala’o atuasaun iha terrenu kumpre nafatin prinsípiu direitu umanu.

Provedora PDHJ, Jesuina Maria Ferreira Gomes, hateten durante ne’e PDHJ iha programa formasaun ba membru PNTL no konsidera presija iha formasaun kontínua.

Notísia relevante:Membru PNTL baku Octavio Thal submete ba investigasaun

Programa formasaun ne’e, PDHJ serbisu hamutuk ho parseiru hosi Unidade Asesoria Direitu Umanu Nasaun Unida iha Timor-Leste (UADU-UN) no akademia polísia, ne’ebé konsege halo ona formasaun ba membru 458, hosi tinan 2015 to’o 2020.

Hosi partisipante hirak-ne’e, iha feto na’in 98 no mane na’in 360, ho nia persentajen iha membru 10% mak iha ona koñesimentu kona-bá direitu umanu.

“Maibe iha atuasaun membru balun kontinua akontese liga ba violasaun direitu umanu. Tanba ne’e, presiza nafatin formasaun kona-bá knaar PNTL no direitu umanu,’’ Jesuina Maria Ferreira Gomes hateten ba jornalista Agência Tatoli, via email, segunda ne’e.

PDHJ haree katak, atu muda atitude hirak-ne’e komandu PNTL tenke esfrosu makaas no tenke kria sistema, prosedimentu, fó formasaun kontínua, halo kontrolu efikáz, ejize akuntabilidade no responsabilidade hosi komandante no ajente-sira.

Alende ne’e, Komandu tenke halo avaliasaun regulár ba dezempeñu komandante no ajente-sira, hadi’a jestaun rekursu matéria, finanseira no rekursu  umanu, foti medida rigorozu ba membru-sira ne’ebé komete violasaun ba direitu umanu.

PDHJ sujere ba Komandu PNTL atu prevee orsamentu hodi fó formasaun ba membru hotu-hotu iha área direitu umanu, tanba durante ne’e PDHJ ho UADU mak finansia formasaun.

Provedora, Jesuina Maria mós esplika, forsa seguransa atu uza meiu hanesan negosiasaun, mediasaun, persuasaun no rezolusaun ba konflitu, bainhira hasoru situasaun konflitu iha terrenu no bele de’it uza forsa naton atu hamate risku ba ema seluk nia integridade fízika ka moris bainhira medida-sira temi la-violentu durante konflitu esgotadu, hanesan garante iha dekretu lei númeru 43/2011, loron 21 setembru, rejime jurídiku uza forsa, tanba ne’e uza forsa proporsionál tuir grau ameasa ne’ebé iha.

Tuir dadus hosi PDHJ, durante implementasaun serka sanitária no komfinamentu obrigatóriu rejista ona keixa neen (6) liga ho implementasaun medida ezekusaun EE no keixa ne’en kona-bá atuasaun membru PNTL, ne’ebé halo agresaun fízika ba sidadaun-sira.

Kazu haat iha ona prosesu investigasaun no keixa rua  foin tama no tipu violasaun mak direitu ba liberdade, seguransa no integridade.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here