Kbiit-laek sira forma iha aredór Madre Kongregasaun Fillas ba Karidade Kanosiana (FDCC- sigla portugés), Balide, Dili, hodi simu nesesidade báziku, segunda (24/05). Imajen Tatoli/Arminda Fonseca

DILI, 24 maiu 2021 (TATOLI)- Eskola Portugeza Ruy Cinatti, Balide, Dili, fó apoiu foos saka-35 ba Madre Kongregasaun Fillas ba Karidade Kanosiana (FDCC- sigla portugés) atu fó apoiu ba kbiit-laek ne’ebé loroloron ba husu hahán iha Madre-sira.

Notísia Relevante : Kada loron, abitante uma-kain 700 husu ai-han ba Madre Kanosiana

Madre Guillermina  Marçal, hateten loron-rua liubá  sira la fahe apoiu nesesidade báziku ba vítima dezastre naturál no  kbiit-laek tanba estoke ai-han laiha, no ohin foin kontinua fahe fila-fali tanba iha sábadu hetan apoiu foos, mina no sasán seluk tan hosi Eskola Portugeza Ruy Cinatto, Balide, Dili.

“Ami la distribui nesesidade báziku ba komunidade durante loron rua liubá tanba ai-han hotu no iha sábadu (22/05), ita-nia maluk Eskola Portugeza Balide mai fó apoiu foos saka 35, mina masa ki’ik kaixa-10, Tango kaixa lima, Abc Moca kaixa lima, Energen kaixa lima no seluk tan, ne’ebé ami rasik hasai osan ba sosa tan sasán mai aumenta hodi distribui ba maluk sira ne’ebé mai husu hahán,” Madre Guilhermina Marçal, informa ba Agência Tatoli iha Konventu FDCC, Balide, Dili,  segunda ne’e.

Nia informa, eskola Portugeza la’ós apoiu ai-han de’it ba Madre FDCC, maibé sira mós loroloron te’in ba labarik ki’ikoan sira ema na’in-100 hosi sentru evakuasaun sira iha Dili laran.

Madre Guilhermina Marçal hateten, abitante-sira ne’ebé kada loron ba FDCC Balide, laiha ida mak fila ho liman-mamuk, maibé hotu-hotu hetan apoiu mak fila maske uitoan, maibé Madre-sira esforsu fó apoiu hotu ba maluk kbiit-laek sira.

“Dala ruma ami sente, kbiit laiha, maibé situasaun difisil ida agora ne’e ita-nia komunidade dadersán de’it mai hamriik ona iha portaun husu hahán, entaun ami buka maneira oioin fó apoiu sira,” Madre Guilhermina Marçal tenik.

 Antes ne’e ema ne’ebé fó apoiu sasán no osan uitoan ba FDCC hodi distribui fali komunidade ba mak nia dehan, hosi, Ofisina  Motor Brother, Banku Mandiri, Alumi Canosiana, Komunidade Portugeza, Joven Kulu-Hun, Timor-Leste Vission, individuu balu no grupu balu, ne’ebé labele temi naran sai hotu, inklui mós Governu liuhosi Ministériu Solidariedade Sosiál no Inkluzaun (MSSI) ne’ebé fó apoiu dala rua ona.

“Atu hateten loloos katak apoiu sira ne’ebé ohin tama hotu kedas, tanba ema barak, ne’ebé ami simu apoiu maibé kada loron ami mak hasai barak, tanba apoiu laiha ema mai barak ami nafatin tenke hasai osan,” nia dehan.

Nia hatutan, dezde fulan ida loron 20 ona, FDCC loro-loron kontinua fó apoiu nesesidade báziku ba ema kbiit-laek no kona-ba montante osan ne’ebé FDCC rasik hasai nia parte labele ko’alia sai tanba ida ne’e Madre sira de’it mak bele hatene.

“Apoiu ne’ebé ami  fó ba abitante-sira mak hanesan, foos kilo lima kada ema, batar plástiku ki’ik ida, masin-midar $0.50 ino mina litru botir ki’ik ida, no agora labarik ki’ikoan-sira mós reprezentante inan-aman entaun biskoit balu ne’ebé ami iha fó ba sira han,” Madre Guilhermina tenik.

Maria Alves, nu’udár abitante Fatuahi, ne’ebé simu ai-han hosi Madre-sira FDCC hateten, nia agradese tebes ba Madre Kanosiana sira tanba bele ajuda ona nia ho nia família atu hetan netik ai-han.

“Ami uma laran na’in- tolu, maske hahán ne’ebé ohin ha’u mai simu uitoan, maibé ha’u agradese tanba Madre-sira fuan boot bele ajuda ona ami, tanba ne’e ami husu ba Governu ba oin bele ajuda lalais ami, tanba ami hamlaha la’o ain hosi Fatuahi mai simu hahán uitoan hosi Madre- sira, tanba to’o agora ami seidauk simu apoiu ruma hosi Governu,”  Maria Alves  hateten.

Iha hanesan, feto faluk Emília da Conceição Silva Nascimento, agradese ba Madre FDCC Balide, tanba nia hela de’it ho nia oan mane, maibé oan mane mós la servisu, entaun hahán laiha atu konsumu loroloron.

“Ha’u rona Madre-sira fó apoiu nesesidade báziku ba komunidade, entaun ha’u la’o ain hosi Becora mai simu foos uitoan ba han, tanba ha’u faluk maske ha’u-nia oan na’in neen, maibé forma hotu ona família no iha situasaun difisil ida-ne’e la fó ai-han ba ha’u, iha uma hahán laiha entaun tenke mai simu hahán iha Madre-sira,” Emília da Conceição Silva Nascimento hateten.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here