Membru PN hosi Bankada PD, António da Conceição ‘Kalohan'. Imajen TATOLI/António Gonçalves

DILI, 24 maiu 2021 (TATOLI)—Bankada Partidu Demokrátiku (PD) iha uma fukun Parlamentu Nasionál, husu VIII Governu Konstitusionál halo avaliasaun ba efeitu sira hosi aplikasaun medida serka sanitária no konfinamentu domisiliária tanba halo povu sai vítima.

Xefe Bankada PD, Deputadu António da Conceição ‘Kalohan’, hateten aplikasaun estadu emerjénsia liuhosi medida serka sanitária no konfinamentu domisiliária ne’e lori ona vítima barak, balu mate tara-aan tanba hahan laiha no estudante barak kontesta no Governu nonook de’it.

“Ita presiza foti lisaun ruma hodi avalia fila-fali medida sira-ne’ebé ita hola ne’e, katak oinsá mak ita bele jere COVID-19 iha Timor-Leste. Laiha ema-ida dúvida katak COVID-19 ne’e iha. Buat ne’ebé ema kestiona mak aktu jestaun ba COVID-19. Efeitu mak aktu brutalizmu hosi ajente (oknum) PNTL,” Xefe Bankada PD ne’e levanta liuhosi plenária, segunda ne’e.

Nu’udar reprezentante povu, nia husu VIII Governu Konstitusionál lideradu Primeiru-Ministru (PM), Taur Matan Ruak, tenke halo avaliasaun ba medida sira-ne’ebé hola to’o ohin loron.

“Ha’u apresia Prezidente Repúblika nia mensajen, ne’ebé husu atu Governu garante ai-han ba nia povu. Prezidente Repúblika husu tanba Prezidente Repúblika tanba akompaña hela, aktu governativu ne’e iha Governu entaun presiza reasaun. Labele estátiku hodi haree katak kuandu ema hamlaha, ita dehan ema-ida. Uluk ne’e uluk, agora ne’e ita iha Governu,” nia kestiona.

Nia hateten, kuandu governa ona tenke asume mós responsabilidade ba povu iha aplikasaun serka sanitária no konfinamentu obrigatória ne’e.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here