Deputada Bankada CNRT. Virgínia Ana Belo. Imajen/Cipriano Colo.

DILI, 24 maiu 2021 (TATOLI)—Bankada Congresso Nacional de Reconstrução de Timorense (CNRT), fó votu favorável ba aprovasaun finál globál ba projetu-lei kódigu mineiru tanba konsidera nu’udar asuntu interese nasionál.

Membru Bankada CNRT Deputada Virgínia Ana Belo, fó parabéns ba deputadu sira hotu no parte Governu ne’ebé aprova ona projetu-lei refere, tanba aprovasaun ida-ne’e lori prosesu ida naruk tebes no to’o ikus konsege iha solusaun ka konkordánsia ida.

“Ida-ne’e hatudu katak ba interese nasionál CNRT sempre tau nia pozisaun ba interese nasionál. Ami la rekua ba kualkér interese nasionál. Tanba ne’e, ami espera depois aprovasaun ka sai ba lei ita bele diminui depedénsia ba fundu minarai,” Deputada Bankada CNRT, ko’alia liuhosi plenária, segunda ne’e.

Nia dehan, bainhira iha ezekusaun mak Governu hasoru problema ruma, sei tuur hamutuk fila-fali hodi haree tanba kualkér lei la perfeitu.

“Dala-ida tán, ami (Bankada CNRT) ba interese nasionál laiha rezerva,” nia hateten.

Deputada Virgínia ko’alia asuntu ne’e tanba sai proponente ba projetu-lei dezde CNRT sei hola-parte iha VIII Governu Konstitusionál.

Proponente ba Projetu-Lei ne’e mak hanesan Deputada Virgínia Ana Belo, Deputadu Duarte Nunes, Adérito Hugo da Costa, Francisco de Vasconcelos, António Nobre Tilman, Maria Fernanda Lay, Maria Terezinha Viegas, Mariano Assanami Sabino, António da Conceição no Maria Angelina.

Notísia Relevante: PN aprova projetu-lei kódigu mineiru ho unanimidade  

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here