Ekipa SIJK halo kremasaun ba mate-isin Chen Xian Ling iha semitériu públiku Metinaro. Imajen TATOLI/Felicidade Ximenes.

DILI, 22 maiu 2021 (TATOLI)—Governu liuhosi Sentru Integradu Jestaun Krize (SIJK) hamutuk ho familia matebian halo kremasaun ba mate-isin Chen Xian Ling ne’ebé mate ho COVID-19 iha semiteriu públiku Metinaro.

Koordenadór ba Destakamentu Reasaun Rapida, Aurelio Guterres, hateten ekipa obitu hamutuk ho seguransa no fam’ila matebian atu halo prosesu kremasaun ba matebian Chen Xian Ling ne’ebé mak mai hosi rai dook durante kona COVID-19 no fila hikas ba Maromak nia kadunan santu.

”Família xineza ne’ebé mak iha ne’e, hamutuk ho Governu liuhosi sala Situasaun Sentru Integradu Jestaun Krize hakarak hato’o sentidu kondolénsia ba famíia matebian ne’ebé mak ita hotu iha ne’e hodi akompana prosesu kremasaun,” Aurelio Guterres hateten antes atu halo kremasaun, sábadu ne’e.

Prosesu kremasaun ida-ne’e, nia dehan, primeira vez mak Governu liuhosi sala situasaun no Minsitériu sira hotu hala’o prosesu kremasaun iha semitériu públiku Metinaro. Prosesu ida-ne’e hola parte Governu nian ne’ebé banhira sidadaun balun ne’ebé mak hakarak halo kremasaun ba ninia família sira bainhira vitima ba COVID-19 Governu prontu atu fó apoiu.

”Depois kremasaun ida-ne’e família konkorda katak sei foti ninia akudesan hosi matebian ne’e sei lori ba nia moris fatin iha nasaun Xina,’ Aurelio Guterres hateten.

Ekipa SIJK halo kremasaun ba mate-isin Chen Xian Ling iha semitériu públiku Metinaro. Imajen TATOLI/Felicidade Ximenes.

Reprezentante família, Rudy Kwan hateten durante ne’e família matebian hamutuk ho Governu Timor-Leste ho Embaixador Xina iha Timor Leste konkorda atu halo kremasaun entaun to’o ikus familia deside duni atu halo kremasaun iha fatin ne’ebé Govenru prepara iha Metinaro ida-ne’e.

”Matebian Chen Xian Ling durante iha Timor-Leste kleur ona, tinan 10 liu, sira mai halo negósiu iha parte Beto Comoro. Ninia akudesan ne’e família sei lori ba nia moris fatin Xina,” Rudy Kwan informa.

Matebian Chen Xian Ling mate ho idade 58 tanba moras tensaun ho diabetes durante tinan tolu resin hafoin atakasaun iha loron 14 maiu familia lori ba Ospitál Nasionál Guido Valadares halo teste swab detekta pozitivu COVID-19, no iha loron ne’e kedas transfere ba sala izolamentu Vera Cruz hodi halo tratamentu maibé too iha loron 16 maiu matebian hakotu iis.

Jornalista: Felicidade Ximenes

Editór: Cancio Ximenes

 

HAKEREK NO HATÁN

Please enter your comment!
Please enter your name here