Ministru Obra Públika, Salvador Soares dos Reis Pires.Imajen Tatoli/Antonio Goncalves

DILI, 22 maiu 2021 (TATOLI)—Ministru Obra Públika (MOP), Salvador Eugénio Soares dos Reis Pires, husu ba funsionáriu ne’ebé ho kargu xefia iha ministériu ne’e, atu deklara riku-soin ba Komisaun Anti Korrupsaun (CAC sígla portugés), bazeia ba despaixu ne’ebé haruka ona ba kada diresaun.

“Lei ejize funsionáriu ho kargu xefia atu halo deklarasaun riku-soin, liuliu ita-boot sira-nia bens no interese pesoál. Konsellu Ministru anunsia ona katak, tarde liu fulan jullu tenke hatama ona ita-boot sira-nia deklarasaun interese pesoál-sira,” komunikadu ne’ebé Agência Tatoli asesu, sabádu ne’e.

Notísia relevante:Deklara riku-soin, CAC hahú arrolamentu ba kargu xefia

MOP hato’o kestaun ne’e, liu hosi enkontru ho funsionáriu ne’ebé ho kargu xefia, kompostu hosi Diretór Jerál, Inspetór Jerál, Diretór Nasionál, Xefe departamentu, xefe sesaun no assessor-sira kona-bá ezekusaun Orsamentu Jerál Estadu (OJE) 2021.

Ministru Salvadór fó-sai ona despaixu ne’ebé haruka ona ba diresaun hotu ho formuláriu hosi CAC atu prienxe, maibé bainhira iha difikuldade bele organiza enkontru ho parte CAC atu hetan esklaresimentu.

Salvadór Eugénio Soares dos Reis Pires deklara ona riku-soin iha juñu 2018 ba Tribunál Rekursu (TR), hafoin simu posse nu’udár membru VIII Governu.

Tuir Lei Anti Korupsaun nú 7/2020,26  agostu kona-bá Medida Prevensaun no Kombate Korrupsaun, iha artigu 29, katak, ema ne’ebé iha obrigasaun atu deklara rendimentu, bens no interese mak hanesan, Prezidente Repúblika, Deputadu Parlamentu Nasionál, Membrru Governu,  Kargu eleitu Podér Lokál, Majistradu Judisiál, Majistradu Ministériu Públiku, Provedór Direitu Umanu no Justisa ho nia Adjuntu sira,  membru Komisaun Nasionál Eleisaun,  Defensór Públiku,  Embaixadór, konsúl no responsável ba finansa reprezentasaun diplomátiku Reitór no dekanu hosi universidade públiku-sira,  Dirijente másimu hosi órgaun administrativa indireita, autónoma no entidade administrativa independente.

Alende ne’e, Xefe Casa Sivíl, Prezidente Repúblika, Sekretáriu Jerál no Sekretáriu Jerál adjuntu Parlamentu Nasionál, Komisáriu hosi CAC ho Adjuntu-sira, Xefe Gabinete membru Governu nian,  Administradór munisipál no prezidente autoridade munisipál, Prezidente no Sekretáriu Autoridade Rejiaun Administrativa Espesiál Oekusi Ambeno,  Diretór Jerál, Diretór no Xefe Departamentu hosi Administrasaun Públika direta, indireta no autónoma, inklui ho serbisu-sira iha Prezidente Repúblika, Parlamentu Nasionál no Tribunál-sira.

Diretór Jerál, diretór no xefe departamentu hosi administrasaun autoridade lokál-nian,  Dirijente no funsionáriu-sira ne’ebé ligadu ho aprovizionamentu no kontratasaun públika, Dirijente no funsionáriu-sira ne’ebé ligadu ho likidasaun no kobransa impostu,  Dirijente no funsionáriu-sira ne’ebé ligadu ho likidasaun no kobransa ba direitu aduanéiru, Dirijente no funsionáriu-sira ne’ebé ligadu ho jestaun ba rai, propriedade imobiliária no patrimóniu Estadu-nian hirak seluk no mós autarkia lokál-nian, Dirijente no funsionáriu-sira ne’ebé ligadu ho inspesaun, supervizaun no auditória,  Ofisiál justisa iha Tribunál-sira, Ministériu Públiku no Defensoria Públika, Membru-sira hosi polísia investigasaun kriminál no Serbisu Migrasaun, no Asesór hosi gabinete membru Governu-nian.

Iha artigu 30 hosi Lei kona-bá Deklarante nia agregadu família maka, deklarante fó informasaun kona-bá rendimentu, bens no interese, obrigasaun no despeza hosi ninia membru agregadu família-nian.

Membru agregadu família deklarante-nian maka, feen-la’en ka ema ne’ebé nia-moris hamutuk hanesan kaben-na’in, oan menór ka iha dependénsia ekonomia ba nia no ema sira ne’ebé iha dependénsia ekonomia ba nia.

Jornalista: Florencio Miranda Ximenes

Editór: Cipriano Colo

HAKEREK NO HATÁN

Please enter your comment!
Please enter your name here