Diretór Ezekutivu CEPAD, João Boavida. Imajen Tatoli/Egas Cristóvão.

DILI, 22 maiu 2021 (TATOLI)—Organizasaun Naun Governamentál Sentru Estudu ba Pás no Dezenvolvimentu (CEPAD-sigla portugés), husu Governu atu hakotu (husik) ona medida serka sanitária no konfinamentu obrigatória no aposta polítika foun iha prevensaun propagasaun surtu COVID-19.

Diretór CEPAD, João Boavida, hateten dezde marsu 2019 to’o ona maiu 2021 ne’e Timor-Leste la’o ho estadu emerjénsia no Governu aplika medida barak liu mak serka sanitária no konfinamentu obrigatória, maibé la efikás tanba timor-oan mate ho COVID-19 no kazu kada loron kontinua aumenta.

“Governu kaer-metin loos medida rua ne’e. CEPAD haree katak estratéjia rua ne’e la efetivu. Se COVID-19 ne’e foin mosu iha Timor fulan rua ka tolu karik oin seluk, agora tinan rua resin ona. Ne’e hatudu mai ita momoos katak ita-nia Governu seidauk iha susesu atu halo jestaun COVID-19 iha Timor-Leste. Governu tenke brani haksoit sai hosi medida rua ne’e aposta polítika foun,” Diretór CEPAD informa ba jornalista sira, iha Dili, sábadu ne’e.

Loloos iha marsu 2019 ne’e, nia dehan, aplika kedas serka sanitária no konfinamentu obrigatória iha área froneira sira hanesan Rejiaun Administrativa Espesiál Oé-Cusse Ambeno (RAEOA), munisípiu Bobonaro no Covalima, maibé intervensaun Governu nian tarde.

Nia fundamenta, polítika integrada ne’e mak entidade Governu nian liuliu Ministériu Saúde tenke hakbiit koñesimentu populasaun nian oinsá familiár ka moris ho COVID-19, nune’e atividade ekonomia rai-laran la’o maibé nafatin kumpre regra protokolu.

Durante ne’e, nia observa, Sentru Intregradu ba Jestaun Krize (CIGC-sigla portugés) fó-sai kazu ne’e haree liu ba kuantidade kazu maibé la aposta ba kualidade, katak ema mate ho COVID-19 ka mate tanba moras seluk.

Nia husu Governu muda polítika kona-ba jestaun COVID-19 iha Timor-Leste no aposta polítika foun hodi apár ho situasaun Timor-Leste nian.

“Se ita mantein ho medida rua ne’e to’o tinan rua tán mós sei la susesu nafatin, Governu tenke brani haksoit sai hosi ne’e no halo polítika ka medida foun hodi aposta polítika foun, hodi hakbiit populasaun nia koñesimentu, oinsá mak bele moris hamutuk ho COVID-19.

Tanba agora ba oin ne’e, timor-oan hotu tenke konsidera COVID-19 buat ida perigu, oho ema, se buat báziku sira-ne’e populasaun hotu hatene ona, entaun hotu-hotu hatene ona oinsá halo prevensaun ba-aan rasik.

Durante ne’e, medida sira-ne’e redús interasaun sosiál maibé Governu haluha tiha populasaun vulneraverál sira-nia kondisaun moris no haluha tiha efeitu sira kona-ba psikolójika.

“Governu tenke hanoin oinsá mak hamosu polítika ida kondiz ho ita-nia kondisaun, tanba ita-nia populasaun millaun 1.2, ho rai ida kiik ita la konsege halo jestaun ba COVID-19 ne’e. Ha’u haree buat ruma sala iha Governu nia polítika. Governu nia polítika labele hela de’it ho konfinamentu no serka sanitaria de’it, ita tenke haksoit sai hosi medida rua ne’e,” nia propoin.

Tuir nia, atividade kulturál no atividade relilioza sira, funerál sira tenke iha limitasaun tanba medida sira-ne’e povu kiik mak kumpre maibé boot sira ba nafatin tuir prosesu funerál.

“Ita bandu populasaun bainbain atu hetan malu, ida-ne’e mós ladi’ak tanba kontájiu COVID-19 nian ne’e la mai hosi populasaun hetan malu beibeik. Ita hetan malu demora menutu tolu haat de’it maibé ita ba tuir prosesu funerál ba serbisu fatin iha eskrtióriu oras ba oras. Ne’e mós bele dehan hosi serbisu fatin bele lori COVID-19 ba uma, Governu tenke haree,” nia hateten.

Tanba ne’e, nia husu Governu halo rotasaun ba funsionáriu sira nune’e kumpre distansiamentu sosiál, tanba funsionáriu sira-ne’ebé kontinua serbisu mak lori fali COVID-19 ba uma ka sosiedade.

Diretór CEPAD konkorda populasaun hotu-hotu tenke simu vasina, tanba ne’e Governu tenke hamamar no hamaus nafatin populasaun ne’ebé ulun to’os, atubele simu vasina tanba aumenta imunidade ema idak-idak nian.

“Agora Governu mós tenke konsidera opiniaun sira hodi hatama mós vasina sira seluk (labele AstraZeneca de’it), hodi muda populasaun nia hanoin nune’e ema sira-ne’ebé ta’uk vasina AstraZeneca ne’e bele simu fali vasina seluk,” nia dehan.

Maibé, nia dehan, teste swab ne’e labele obrigatóriu ba ema hotu maibé obriga ba ema sira-ne’ebé família mate ho COVID-19, vasina ne’e tenke obriga ema hotu.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here