Aprezentasaun baku babadok nu’udar kultura Timor-Leste nian uainhira aprezenta iha Pre-Expo Timor Leste Road to Dubai 2021 ne’ebé hala’o iha CCD. Imajen TATOLI/António Gonçalves

DILI, 21 maiu 2021 (TATOLI)-Loron 21 fulan maiu, kada tinan, mundu  selebra loron internasionál ba diversidade kulturál, diálogu no dezenvolvimentu nian, ho objetivu promove diversidade ho espíritu solidáriu, fraternidade, toleránsia, promove valór umanizmu no respeita mútua iha ambiente multikulturál no diversidade opiniaun hodi kontribui ba dezenvolvimentu komún.

Ba tinan ne’e, ema hotu iha mundu, selebra loron  ida-ne’e iha situasaun pandemia COVID-19. Nune’e, tuir Prezidente Ezekutivu Konsellu Nasionál Juventude Katólika Timor-Leste (CNJCTL), Pe. João Soares hateten, katak komemorasaun loron mundiál ba diversidade kulturál nian iha Timor-Leste (TL) iha situasaun COVID-19 husu ema hotu presiza mak valoriza kultura unidade.

Loron mundiál ba diversidade kulturál ba diálogu no dezenvolvimentu proklama hosi Organizasaun Nasaun Unida (ONU) iha tinan 2002, iha ámbitu komemorasaun ba aprovasaun deklarasaun Universál UNESCO kona-ba diversidade kulturál iha tinan 2001.

Pe. João Soares esplika ko’alia kona-ba kultura hanesan ema hotu hatene katak kultura ne’e hanesan konjuntu hosi ábitu ka maneira estilu moris nian, no mós ema ida-idak ninian fiar no koñesimentu hosi povu, sosiedade no fatin ida.

Nia dehan, hanesan ema barak komprende no hatene katak iha mundu ema ida-idak ho ninia kultura rasik, kultura ne’e reprezenta identidade ida bainhira ko’alia kona-ba identidade ne’e ko’alia kona-ba karakterístika estilu moris nian no bainhira ko’alia kona-ba identidade mós ko’alia kona-ba ninia própria kultura, mezmu nune’e, hotu-hotu hatene katak iha Timor-Leste klaru língua Tetun, língua ida ne’ebé bele unifika ba iha eis-kultura kompostu hosi étniku no ema ida-idak ninian estilu moris nian.

“Grasa Maromak nian ita Timor maske iha defeitu oi-oin, maibé konsiente di’ak tebes katak respeita mútua entre ema ida ba ema seluk grupu ida ba grupu seluk no rai ida ba rai seluk, iha Timor ita ne’e forte tebe-tebes. Ida ne’e ba ita priviléjiu boot tanba ita iha kultura no língua ne’ebé diferente, maibé ita-nia komunidade ne’e sai hanesan ita-nia kultura ida, maske iha dezentendimentu ki’ik oan, maibé ida-ne’e dalan la’ós atu minimiza ka harahun ita-nia kultura ida ne’ebé ita bolu naran unidade,” nia hateten hodi responde ba Agência Tatoli liuhosi telefónika sesta ne’e.

Atu mantein paz, armonia sosiál no dezenvolvimentu iha ámbitu pandemia COVID-19, nia fó hanoin, pandemia ne’e hanesan funu ka bele dehan destruisaun ida hosi konseitu saúde ninian, maibé pandemia ida-ne’e mós tulun atu ema ida-idak bele hakle’an liu tan fali kultura unidade iha ema ida-idak ninia família, komunidade no sosiedade.

“Pandemia ida ne’e mós hanesan kura daudaun fali espíritu ida pasiénsia nian, espíritu fleksibilidade hodi tama iha situasaun ida ne’ebé maka difisil. Ne’e duni pandemia ida mós tulun ema atu valoriza fali aspetu balun ne’ebé iha hela ba kultura unidade nian,” nia argumenta.

Sorin seluk Prezidente Ezekutivu Konsellu Nasionál Izlámiku Timor-Leste (CONISTIL-sigla portugés), Pacoál Sidiq Lemorai hateten, Timor-Leste iha kultura rasik no hosi kultura ne’e iha oi-oin, tanba munisípiu ida ba munisípiu ida-idak ho nia kultura,  maibé valoriza no promove mak presiza ema hotu nia kontribuisaun, kria amizade no toleránsia ba malu.

“Ha’u hanoin ohin loron mundiál diversidade ba kulturál, ita Timor-Leste mós iha kultura rasik, agora oinsá ita atu promove kultura, presiza kria amizade iha nasaun ida tanba nune’e bele promove ita-nia kultura hodi atrai nasaun seluk bele mai vizita ita-nia rai, dalan di’ak mak ita-nia Governu liuhosi Ministériu Turizmu agora promove hela kultura Timor-Leste nian atu ba iha Expo Dubai, ha’u hanoin asaun ida ne’e di’ak atu promove ita-nia kultura iha mundu internasionál nian,” Pascoal Sidiq Lemorai hateten.

Nia dehan, maske TL foin ukun-an, maibé liuhosi kulturál hanoin Timor-Leste bele promove ona iha mundu nune’e nasaun seluk bele koñese Timor-Leste nia kultura.

“Ha’u-nia mensajen ba sosiedade hotu liuliu ba ha’u-nia komunidade Musulmanu, katak atu hametin espíritu, fraternidade, amizade iha multi kulturál no lingua ida-ne’e, maske ita iha fiar-ida-idak nian ne’ebé la hanesan, maibé moris iha nasaun oinsá mak  ita halo kolaborasaun di’ak ho relijiaun seluk  hamutuk hodi promove kultura Timor-Leste nian iha nasaun ida ho amizade,” nia hateten.

Xefe Suku Bairru-Pité, João Bosco da Costa Belo hateten, iha komemorasaun loron mundiál diversidade kulturál ida-ne’e nia observasaun kona-ba ninia abitante-sira iha nia suku katak durante abitante-sira sempre kria paz, toleránsia armonia no sosiál, maske ida rua mak menus komprensaun maibé sempre kria armonia iha suku laran.

“Iha situasaun pandemia COVID-19 ida ne’e buat ne’ebé ami promove no hametin espíritu iha suku mak kontinua nafatin fahe informasaun polítika COVID-19 nia komunidade, oinsá hamutuk prevene peste ida ne’e. ha’u hanesan autoridade suku nafatin fó hanoin ba komunidade liuliu joven sira katak ita iha Dili mai hosi munisípiu oi-oin ho lian ne’ebé la hanesan maibé iha situasaun iha agora ne’e kontinua halo amizade, kria dame hodi dezenvolve  TL liuhosi promove kultura,” nia subliña.

Jornalista       : Arminda Fonseca

Editór             : Francisco Simões

 

HAKEREK NO HATÁN

Please enter your comment!
Please enter your name here