Pesoál saúde fó vasina ba sidadaun iha sentru saúde iha Dili. Imajen TATOLI/António Gonçalves

DILI, 21 Maiu 2021 (TATOLI)—Dadus hosi Komisaun Interministeriál ba vasina kontra COVID-19, hatudu katak, to’o ohin, sesta 21 maiu 2021, iha sidadaun hamutuk 53.000 mak simu ona vasina AstraZeneca.

Portavoz Komisaun Interministeriál, Danina Coelho, hateten, númeru ne’e konta hamutuk ho vasina doses dahuluk hamutuk 24.000, ne’ebé oferese hosi COVAX Facility, iha primeira faze, inklui dozes 20.000 ne’ebé oferese hosi Austrália ne’ebé lansa, faze daruak iha 10 maiu, tinan ne’e.

Notísia relevante:COVID-19: pozitivu 172, rekoperadu 76 no ativu 2.398

“Ohin ema hamutuk 53.000-resin iha Timor-Leste mak simu ona vasina doze dahuluk, hahú kedan kampaña vasina iha 7 abríl,” Danina Coelho, hateten liu hosi konferénsia imprensa, iha salaun MSSI Caicoli, sesta ne’e.

Nia esplika, pesoál saúde la’ós fó de’it vasina iha postu saúde, maibé hakat ba fatin-fatin, inklui ba to’o aldeia sira.

”48% hosi sira ne’ebé mak simu ona vasina, mai hosi grupu prioridade-sira, ho moras komorbilidade hamutuk 6.046 (24%), ema ho tinan 60 ba leten la ho moras komorbilidade hamutuk 1.268 (5%), pesoál liña frente hamutuk 455 (18%), pesoál saúde hamutuk 110  (1%) no adultu tinan 60 mai kraik la ho moras komorbilidade hamutuk 13.011 (52%),” nia esplika.

Alende ne’e, iha totál, estimadu 19% ema ho idade 18 ba leten iha Dili mak simu ona vasina doze dahuluk.

“Maski pesoál saúde halo esforsu makas, maibé ami haree katak, planu vasinasaun ladún atinje alvu, iha primeira faze fó doze dahuluk. Ami enkoraja família-sira atu lori lalais maluk ho moras króniku no otas liu 60 ba vasina, hodi bele proteje an diak liu,” Danina Coelho, rekomenda.

To’o ohin, Timor-Leste rejista ona kazu COVID-19 konfirmadu hamutuk 5.121 no mate na’in 11. Hosi númeru ne’e, munisípiu Dili mak rejista númeru kazu COVID-19 aas liu.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here