Diretor Jeral MSSI, Rui Manuel Gago Exposto

DILI, 21 maiu 2021 (TATOLI)—Diretór Jerál Ministériu Solidariedade Sosiál no Inkluzaun (MSSI), Rui Manuel Gago Exposto, hateten MSSI halo ona karta pedidu ba Sala Situasaun, Sentru Integradu Jestaun Krize SIJK) hodi autoriza lori apoiu umanitáriu ba munsípiu Covalima tanba armazén iha munisípiu refere mamuk hela.

Notísia Relevante: MSSI fó apoiu foos saka 35.748 ba ema kbiit laek sira

“Ami halo ona karta pedidu ba Sala Situasaun, Sentru Integradu Jestaun Krize (SIJK) atu fó karta autorizasaun ba ami hodi lori apoiu umanitáriu hanesan foos hamutuk saka 2000 ba ita-nia komunidade iha Covalima. Foos ne’e atu fahe ba benefisiáriu sira-ne’ebé presiza duni ita-nia tulun,” Rui Manuel Gago Exposto hateten liuhosi konferénsia imprensa iha salaun MSSI, Caicoli, Dili, sesta ne’e.

Oras ne’e dadaun, nia dehan, stoke foos iha armajén Sentru Solidaridade Sosiál Munisípiu Covalima mamuk, tanba ne’e MSSI halo ona karta autorizasaun ba SIJK maibé seidauk iha resposta, no bainhira SIJK fó ona autorizasaun mak MSSI sei lori apoiu ne’e ba Covalima.

“Parese segunda (24/05), ami sei lori foos 2000 ba Sentru Solidaridade Sosiál iha munisípiu Covalima, nune’e bele asegura iha armajén ne’ebá. Ekipa MSSI nian balun mós sei lori foos 2000 ba armazén munisípiu Lautém nian,” nia dehan.

Jornalista:  Osória Marques

Editór: Cancio Ximenes

 

HAKEREK NO HATÁN

Please enter your comment!
Please enter your name here