Diretór Jerál Administrasaun no Finansa hosi MOP, Januário Patrício Barbosa. Imajen TATOLI/Florêncio Miranda Ximenes

DILI, 21 maiu 2021 (TATOLI)–Ministériu Obra Públika (MOP) transfere ona orsamentu 2021 hamutuk porsentu 50% ba orgaun tutela hanesan Eletricidade de Timor-Leste, Empreza Públika (EDTL, E.P) no Bee Timor-Leste, Empreza Públika (BTL, E.P).

Diretór Jerál Administrasaun no Finansa hosi MOP, Januário Patrício Barbosa, hateten, polítika VIII Governu atu forma EDTL no BTL sai empreza públika hodi jere rasik administrasaun no finansa hodi hatama reseita ba kofre Estadu.

“Iha tinan kotuk (2020), transfere ona orsamentu 50%, liu-liu ba EDTL, E.P hamutuk millaun $78 no BTL,E.P millaun $17, ne’ebé sira halo relatóriu ezekusaun no hatama mak halo fali transferénsia 50%,” Diretór ne’e informa iha Hotel Novo Turismo, Lecidere, sesta ne’e.

Notísia relevante: EDTL,E.P finaliza ona dezeñu dada eletrisidade ba área 31

Hafoin transfere, EDTL, E.P halo ona preparasaun atu halo instalasaun dada eletrisidade ba suku 31, hosi obra pakote 31.

“Ita hein sira mak jere orsamentu, liu-liu loke konkursu públiku ba projetu 32, ne’ebé Governu liuhosi Ministériu Obra Públiku mak sei halo montiorizasaun,” nia akresenta.

Enkuantu, BTL, E.P mós kontinua halo normalizasaun ba estragu sistema bee-moos kauza hosi dezastre naturál no foku ba planu mestre sistema bee-moos iha munisípiu neen.

Nune’e, MOP introdúz mellora sistema abastamentu bee inklui konstrusaun no reabilitasaun sanemanetu komunidade iha área urbanu, rurál, sentru saúde no suku hodi asegura norma abastamentu bee ba benefísiu sidadaun sira.

VIII Governu Konstitusionál hakarak reforsa kuadru legál abastesimentu bee no jestaun rekursu ídriku hodi garante kontinuidade programa eletrifikasaun iha nível nasionál no instala liña distribuisaun.

Nune’e mós, mellora sistema produsaun no fornesimentu enerjia elétrika ho forma viável no sustentável, ho kondisaun bele kontrolu kualidade konstrusaun sivíl no obra públika inklui promove boa governasaun no jestaun institusionál.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here