Irrigasaun. Imajen/Espesiál

DILI, 21 maiu 2021 (TATOLI)Diretór Nasionál Irrigasaun hosi Ministériu Agrikultura Peska (MAP), Martinho Laurentino Soares, informa, daudaun ne’e kompañia sira finaliza ona normalizasaun irrigasaun iha munisípiu sira, ne’ebé hetan estragu hosi dezastre naturál iha fulan-abríl liubá.

“Ministru hola desizaun, husu de’it apoiu ba kompañia lokál hodi normaliza estragu no agora finaliza ona serbisu, tanba ne’e atu halo pagamentu, ami prepara submisaun pedidu pagamentu ne’ebé prosesu la’o hela no tempu badak MAP sei halo pagamentu ba sira,” Diretór dehan ba Agência TATOLI, iha edifísiu MAP Comoro, sesta ne’e.

Notísia relevante: Inundasaun estraga natar 1.900 inklui irrigasaun boot ida

Tuir Dirijente ne’e, iha irrigasaun lubuk ida, ne’ebé kuaze munisípiu hotu hetan estragu hosi inundasaun foin lalais no tanba iha Dili aplika serka sanitária no konfinamentu, difikulta tékniku sira halo movimentu bá munisípiu.

“Irrigasaun boot ne’ebé hetan estragu mak hanesan Maliana II, Alicou, Altas iha Maliana, Webaba iha Suai, Tafara, kasa iha Ainaro, Karau-ulun iha Same, irrigasaun balun iha Lautém, Irabere iha Viqueque, Seiçal iha Baucau no irrigasaun iha Manatuto ne’ebé uluk Japaun halo mós kuaze a’at totál,” nia akresenta.

Ho kondisaun ne’e maka hosi parte MAP orienta atu Diresaun Nasionál Irrigasaun bele normaliza hikas atu atividade agrikultór labele paradu.

“Diresaun ne’e osan laiha, maibé tanba kestaun ne’e ami haree urjente duni, entaun ami tenta atu konvense kompañia lokál sira hodi fó apoiu hadi’a irrigasaun ne’ebé hetan afetadu hosi,” nia hatutan.

Maski nune’e, normalizasaun irrigasaun  iha munisípiu balun sei kontinua la’o, maski maioria kuaze finaliza ona, tanba ne’e bainhira kompañia lokál sira ramata serbisu maka MAP halo pagamentu.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here