Ministra Saúde, Odete Maria Freitas Belo, hamutuk ho Embaixadór EUA ba Timor-Leste, Kevin Blackstone, ko’a fita hodi simbolikamente lansa postu saúde Kadabunak Kamea ne’ebé foin reabilita, sesta (21/05). Imajen/Embaixada EUA

DILI, 21 maiu 2021 (TATOLI)-Forsa Navál Estadu Unidu Amérika (EUA) finaliza ona reabilitasaun  postu saúde Kadabunak, ne’ebé lokaliza iha suku Kamea, postu administrativu Cristo Rei, munisípiu Dili.

Embaixadór EUA ba Timor-Leste, Kevin Blackstone, apresia no agradese ba kontratór timor-oan na’in-sia ne’ebé ho esforsu kontribui matenek ba projetu ne’e.

“Hau orgullu tebes ho serbisu ne’ebé hala’o ona liuhosi parseria entre Estadu Unidu Amérika no Timor-Leste,” Embaixadór Kevin Blackstone hateten liuhosi nota imprensa ne’ebé Agência TATOLI asesu iha sesta ne’e.

Diplomata ne’e dehan, Forsa Navál EUA kuñesidu iha Timor-Leste tanba sira-nia serbisu ne’ebé kualidade iha konstrusaun sala eskola no postu saúde sira durante tinan 10 nia laran.

“Ami orgullu kolabora matenek hosi Forsa Navál no esperiénsia hosi kompañia lokál sira hodi haklean kapasidade setór saúde iha nasaun ne’e. Traballadór lokál ne’ebé profisionál, fó sira-nia domin no klamar ba projetu hodi serbisu durante tempu naruk iha tempu COVID-19, nune’e asegura postu saúde bele finaliza ho di’ak no exelente. Ami haksolok bele kontribui ba setór saúde no mos ekonomia lokál,” nia subliña.

Ekipa téknika konstrui sala farmasia, sala konsulta maternidade, sala konsulta jerál no sala laboratóriu, nune’e mós troka uma kakuluk, tau azuleiju foun, foru, hadi’a janela no instala tangki bee-moos litru 5.000.

Fundu ba reabilitasaun postu saúde ne’e mai hosi Forsa Navál EUA, hosi verba apoiu umanitária no programa kapasitasaun ba responde ba dezastre iha Timor-Leste ho montante $152.839, ne’ebé sei benefisia abitante 5.000 resin iha suku lima.

Seremónia lansamentu postu saúde ne’e partisipa hosi Ministra Saúde, Odete Maria Freitas Belo, Prezidente Munisípiu Dili, Gaspar Soares no Xefe Suku Kamea, Matos da Costa, inklui entidade relevante seluk.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here