Diretór Jerál Administrasaun no Finansa hosi MOP, Januário Patrício Barbosa. Imajen TATOLI/Florêncio Miranda Ximenes

DILI, 21 maiu 2021 (TATOLI)–Ministériu Obra Públiku (MOP) ezekuta ona Orsamentu Jerál Estadu (0JE) 2021 ho persentajen atinje 52%, hosi totál alokasaun millaun $218.

“Ami-nia ezekusaun orsamentu iha trimestre dahuluk to’o ohin atinje ona 52%, ne’ebé sai ezekusaun di’ak liu, okupa númeru datoluk iha ministériu hotu. Ami espera tinan ne’e nia rohan bele atinje 95%,” Diretór Jerál Administrasaun no Finansa MOP, Januário Patrício Barbosa, hatete iha Hotel Novo Turismo, Lecidere, sesta ne’e.

Orsamentu ne’e inklui ona $158.357.031 ne’ebé destinadu ba provizaun despeza kombustível no manutesaun jeradór liña transmisaun no $21.503.286 destina ba implementasaun atividade relasiona ho medida planu rekuperasaun ekonómika.

“Ami-nia programa no planu iha trimestrál dahuluk hosi MOP ne’ebé atinje ona mak halo manutensaun ba estrada lubuk ida no halo estudu no dezeñu ba ponte 10 hodi implementa iha tinan ne’e inklui komesa finaliza estudu viabilidade sira, ne’ebé tama ona faze dezeñu detalladu sira,” nia akresenta.

Nune’e, iha tinan ne’e, MOP kotinua foku medida prinsipál setorál hanesan konstrusaun, reabilitasaun, manutesaun inklui estrada rejionál no rurál sira ne’ebé liga ba área produtivu iha merkadu.

Nune’e  mós, implementa programa kontrolu inundasaun no situasaun emerjénsia, ho forma atu asegura konetividade iha terrtóriu nasionál tomak.

“Ami halo reuniaun jerál hodi ko’alia liuliu halo avaliasaun internál ba ami-nia servisu durante períodu tirmestrál dahuluk no reforma esturuturál tanba iha tinan ida-ne’e ami halo mudansa boot ida iha Ministériu Obra Públika,” nia hatutan.

Tuir nia, MOP hamosu Diresaun Jerál Planemantu no Urbana inklui reforma estrutura Diresaun Jerál Obra Públika, Diresaun Nasionál Estrada, Ponte no kontrolu Cheia inklui Diresaun Jerál Administrasaun no Finansa.

Reuniaun ne’e, lidera hosi Ministru Obra Públika, Salvador Eugênio Soares dos Reis Pires, hodi rona aprezentasaun progresu servisu no fó orientasaun ba Diresaun Jerál Obra Públika atu ezekuta planu no programa ne’ebé orsamenta ona iha 2021.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here