Magnífiku Reitór UNPAZ, Adolmando Soares Amaral. Imajen TATOLI/Egas Cristovão

DILI, 21 maiu 2021 (TATOLI) – Estudante finalista 1.237 hosi Universidade da Paz (UNPAZ)  preparadu ona atu iha loron 27 maiu ne’e, hala’o estájiu sosiál iha Suku Remarhei ho Suku Estadu Munisípiu Ermera, atu realiza planu suku moris saudavel.

Notísia Relevante : 2020, UNPAZ prodús lisensiatura 1,412 no mestradu 24

Magnífiku Reitór UNPAZ, Adolmando Amaral, sesta ne’e, informa ba Agência Tatoli katak estudante finalista 1.237 atu hala’o estájiu sosiál iha suku rua iha Munisípiu Ermera, atu konstroi hariis-fatin, lixeira no harii fatin saneamentu iha aldeia 22.

“Ami hili Suku Ramarhei ho aldeia sia (9), suku Estadu ho aldeia 12 ne’e atu sai ezemplu ida ba suku moris saudavel kada uma kain iha suku rua ne’e sei hetan fatin lixu ida inklui hariis-fatin no fasilidade saneamentu. Obra sira ne’e sei konstroi hosi ami-nia estudante estajiáriu-sira,” Adolmando Amaral hateten iha  nia servisu fatin, kampus UNPAZ., Dili.

Hosi estudante finalista 1.237 ne’e kompostu hosi fakuldade neen (6) mak hanesan Fakuldade Ekonomia, Direitu, Siénsia Sosiál Umana, Siénsia Saúde Publika, Enjeñaria no Agríkola. Estudante sira-ne’e sei hela iha suku-rua durante fulan rua atu finaliza planu suku moris saudavel ba populasaun sira iha Ermera.

Nia afirma katak estudante sira ne’e tenke partisipa iha estájiu sosiál ne’e, tanba estájiu ne’e sei determina sira-nia prosesu ensinu aprendizajen ikus iha UNPAZ.

Nia hateten, estudante no dosente ne’ebé akompaña prosesu estájiu iha Munisípiu Ermera tenke kumpre regra protokolu ne’ebé hasai ona hosi Ministériu Saúde no Organizasaun Mundiál Saúde (OMS) kona-ba prevensaun COVID-19, liuliu sira tenke hetan uluk rezultadu teste swab molok ba hala’o estájiu iha Ermera.

Jornalista       : Tomé Amado

Editór             : Francisco Simões

HAKEREK NO HATÁN

Please enter your comment!
Please enter your name here