Estudante-sira uza máskara no fase hela liman molok partisipa iha abertura prosesu aprendizajen iha Eskola São José Operário, Balide, Dili. Imajen Tatoli/Dok

DILI, 21 maiu 2021 (TATOLI) – Eskola Ensinu Báziku São José Operáriu, Balide, Dili, prepara tan rezumu matéria trimestrál daruak nian atu distribui ba alunu 710 iha tempu besik.

Adjuntu Diretór Eskola  Báziku São José Operáriu siklu 3, Anacleto da Costa, hateten eskola prepara ona rezumu matéria trimestrál daruak nian atu distribui ba alunu-sira. Maibé hein desizaun Governu nian iha ámbitu Estadu emerjénsia ne’e.

“Ami seidauk halo imprime tanba hein hela desizaun saida mak Governu sei foti tuir mai. Karik kontinua extende maka ami sei imprime rezumu matéria hodi distribui ba alunu-sira,” Anacleto da Costa, hateten ba Agência Tatoli iha nia servisu fatin Eskola  Báziku São José Operáriu, sesta ne’e.

Matéria sira ne’e kompostu hosi dixiplina Lingua Portugés, Lingua Ingles, Lingua Tetun, Matemátika, Siénsia Fízika Naturaís, (Biolojia e Fízika), Edukasaun Sidadania, Istória Jeografia, Relijiaun Morál, Edukasaun Desportiva no Arte Kultura.

Anacleto esplika antes ne’e sira implementa medida aula online ba alunu sira. Medida ne’e laiha benefísiu tanba estudante barak laiha telefone android atu asesu aula online ne’e inklui mós implementa eskola bá uma.

Tuir nia, meius lubuk ida mak Ministériu Edukasaun kria, maibé realidade estudante barak laiha interese no laiha vontade atu akompaña.

“Antes ne’e ami bele dehan estudante la to’o 50% mak asesu ba programa aula online no programa eskola ba uma. Maibé, agora ami bele dehan ho distribuisaun rezumu matéria ne’e kuaze estudante 710 siklu tolu iha Eskola Báziku São José Operáriu hetan hotu ona,” Anacleto tenik.

Jornalista       : Tomé Amado

Editór             : Francisco Simões

HAKEREK NO HATÁN

Please enter your comment!
Please enter your name here