Aviaun Ambulánsia ne’ebé para hela iha Aeroportu Internasionál Prezidente Nicolau Lobato, Comoro. Imajen/MAF.

DILI, 21 maiu 2021 (TATOLI)—Diretór Jerál Serbisu Nasionál Ambulánsia Emerjénsia Médika, Horacio  Sarmento, hateten, desde fulan marsu to’o fulan ne’e, aviaun ambulánsia hala’o hikas operasaun normál, hodi tula pasiente hosi munisípiu mai Ospitál Nasionál Guido Valadares (HNGV sígla portugés).

Horacio Sarmento, dehan, desde dezembru 2020 to’o fevereiru 2021, aviaun ne’e la hala’o operasaun tanba pilotu iha hela Austrália.

Notísia relevante:Aviaun ambulánsia la halo operasaun tanba pilotu iha Austrália

”Baibain aviaun ne’e tula mós pasiente COVID-19 ne’ebé enfrenta problema transporte,” Horacio  Sarmento, hateten iha Caicoli, sesta ne’e.

Kapasidade aviaun ne’e bele tula ema na’in-neen, no dalaruma tula pasiente na’in-rua akompaña ho família na’in-rua, inklui médiku ida ho enfermeiru ida.

Munisípiu ne’ebé asesu ba aviaun ne’e mak Lautém, Baucau, Viqueque, Manufahi, Covalima, Bobonaro, Ataúro, inklui RAEOA tanba munisípiu hirak-ne’e iha kampu aviasaun ne’ebé disponível.

Tuir akordu ne’ebé hatuur iha kontratu, ba-mai Dili-Ataúro, Governu selu kedan $320, karun-liu maka munisípiu Lautém ho RAEOA ho kustu ba-mai $1.035, tuir-kedan Viqueque no Munisípiu sira-seluk ba mai $600 to’o $700.

Governu liu hosi Ministériu Sáude (MS), asina kontratu ho kompañia Mission Aviation Fellowship (MAF), hodi oferese aviaun ambulánsia ne’e hahú hosi 2019 to’o fulan outubru 2021.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here