Hare iha Atabae. Imajen TATOLI/António Gonçalves

DILI, 20 maiu 2020 (TATOLI)—Prezidente Sentru Lojíztika Nasionál (CLN, sigla portugés), Augusto Junior Trindade, hateten tinan ne’e sei sosa hare kulit tonelada 445 hosi agrikultór hodi kompleta stock ai-han iha rai-laran.

“Agora ita tama époka dahuluk kolleta haree iha territóriu laran tomak, tanba ne’e Governu hatama pedidu ba Parlamentu Nasionál liuhosi Orsamentu Ratifikativu ne’ebé aprova ona, atu kompra produtu alimentasaun lokál ho kustu millaun $12, ne’ebé sei sosa produtu hare kulit tonelada 445 inklui produtu alimentasaun sira seluk,” Prezidente CLN informa ba Agência TATOLI, via telefónika, kinta ne’e.

Notísia relevante: CLN halo ona intervensaun merkadu ho foos tonelada 8.400

Nune’e, parte CLN sei halo planu di’ak no jestaun, bainhira konsege sosa ona produtu ai-han sira.

“Ita sei halo diskusaun uluk ba merkadu hafoin mak sosa hare, tanba ita labele sosa de’it hafoin lahatene atu kanaliza ba ne’ebé. Tanba ne’e tenke halo jestaun di’ak mak foin sosa produtu,” nia akresenta.

Iha maiu nia laran ne’e, Ministériu Agrikultura no Peska (MAP) lansa époka dahuluk kolleta hare ektare 75 iha aldeia Helesu, suku atabae, postu administrativu Atabae, munisípiu Bobonaro.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here