Administradór Postu Administrativu Metinaro, Munisípiu Dili, Fausto Soares Dias, simu vasina AstraZeneca doze dahuluk iha Administrasaun Postu Metinaro. Imajen/Espesiál

DILI, 20 Maiu 2021 (TATOLI)—To’o ohin, sidadaun 22.455 simu ona vasina AstraZeneca doze dahuluk ba faze daruak.

”Vasina ne’ebé Governu Austrália oferese uluk doses rihun 20, to’o horisehik ita vasina ona ema na’in 22.455 iha munsípiu Dili,” Diretora Jerál Prestasaun Serbisu Saúde, Ministériu Saúde (MS), Odete da Silva Viegas, hateten ba jornalista-sira, iha Masin Lidun, kinta ne’e.

Notísia relevante:MS lansa imunizasaun COVID-19 doze dahuluk, ba faze daruak

Husi númeru ne’e, la inklui postu administrativu Ataúro ne’ebé tuir planu sei oferese vasina iha semana oin.  

Odete dehan, vasina ne’e prioridade ba ema vulnerável-sira, maibé la taka dalan ba sira ne’ebé hakarak atu simu, bele hakbesik an ba fasilidade saúde.

Nia esplika liu tan, hosi doses rihun 20 ne’ebé horisehik foin to’o iha Timor-Lesete (TL), Ministériu Saúde (MS), seidauk hanoin atu distribui ba munisípiu-sira ne’ebé risku, maibé tuir tarjetu katak, iha munisípiu Dili, sei oferese ba totál sidadaun iha aldeia 241  iha suku 37 ne’ebé seidauk hetan.

Tanba ne’e, to’o horisehik ekipa saúde vasina ona iha aldeia 100 iha Dili, nune’e, Odete mós ohin hahú  fó orientasaun ba ekipa saúde katak, pelu menus  aldeia  141  ne’ebé  seidauk simu vasina, molok 28 maiu tenki konklui ona.

Odete Viegas husu atu aselera prosesu vasinasaun ne’e, tanba, tenke prepara fali ba vasina AstraZeneca  doses daruak hosi COVAX Facility, ne’ebé tuir planu tenke hahú iha juñu 2021.

”ohin ita konklui ona doses rihun 20 ne’ebé Austrália oferese antes no ohin mós ita hahú kedas doses rihun 20 ne’ebé foin to’o TL horisehik. Ita-nia objetivu maka, atu aselera prosesu ne’e ho grupu prioridade ba ema ne’ebé tinan 60 ba leten, no ema ne’ebé ho moras komplikasaun no la taka dalan ba ema ne’ebé hakarak mai vasina,” nia subliña.

Entretantu, MS halo abertura imunizasaun COVID-19 doze dahuluk ba faze daruak, iha 10 maiu 2021 ne’ebé fó prioridade ba populasaun ho moras króniku ka komorbilidade idade 60 ba leten, iha munisípiu Dili.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here