Sekretáriu Estadu Komunikasaun Sosiál, Merício Juvinal dos Reis ‘Akara’. Imajen TATOLI/Egas Cristóvão

DILI, 20 maiu 2021 (TATOLI)–Sekretáriu Estadu Komunikasaun Sosiál (SEKOMS), Merício Juvinal dos Reis ‘Akara’, konsidera loron Restaurasaun Independénsia da-19 iha 20 maiu iha tinan ne’e nu’udar reflesaun.

“Ita-nia loron Restaurasaun Independénsia la’o kleur ona, agora ba da-19, hau hanoin ita aproveita aniversáriu ne’e atu halo reflesaun kle’an kona-ba ita-nia prosesu hotu ne’ebé daudaun la’o oinsá, tanba ita mak responsabilidade ba nasaun ne’e. Entaun ne’e hanesan sentimentu nasionalizmu ne’ebé ita iha tenki manifesta no kontribui ba prosesu dezenvolvimentu nasionál,” Sekretáriu Estadu Akara, hato’o mensajen foin lalais ne’e, iha ninia knaar fatin, Palásiu Governu.

Tinan ne’e laiha eventu ruma ba loron istóriku ne’e tanba tama iha situasaun kalamidade, ne’ebé nasaun enfrenta problema dezastre naturál no COVID-19.

“Ita enfrenta inundasaun no pandemia ne’ebé mak halo ita la livre atu halo selebrasaun ba loron importante ne’e tanba tenke kumpre medida ne’ebé aplika,” nia akresenta.

Maski nune’e, nia konvida sidadaun hotu labele lakon sentidu ka valór prinsipál hosi loron nasionál ne’e.

“Nafatin hatudu sentidu pertense ba Estadu no hamutuk nafatin lori ita-nia nasaun ba oin, tanba ita-nia mehi ida de’it ba prospriedade populasaun no nasaun tenki kualidade hanesan nasaun sira seluk,” governante ne’e enkoraja.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here