Prezidente Repúblika, Francisco Guterres 'Lú-Olo'. Imajen Tatoli/Antonio Gonçalves.

DILI, 20 maiu 2021 (TATOLI)—Prezidente Repúblika (PR) Francisco Guterres ‘Lú Olo’ husu Governu atu hakerek dekretu ezekusaun Orsamentu Jerál Estadu (OJE) ho lian Tétun nune’e implementadór sira kompreende ho didi’ak.

Xefe Estadu fó hanoin ne’e tanba servidór Estadu sira maioria la kompreende lian Portugés no dekretu ezekusaun sira maioria uza versaun portugés.

“Tanba ne’e, Dekretu Ezekusaun OJE tenke hakerek mós iha lian Tétun no simples atu implementadór sira bele kompreende ho di’ak. Nune’e de’it mak Governu bele implemnta OGE ho rigór no transparénsia,” Prezidente Repúblika hato’o nia mensajen Estadu iha selebrasaun aniversáriu ba da-19, iha Palásiu Prezidensiál Nicolau Lobato, Bairru Pite, Dili, kinta ne’e.

Purtantu dokumentasaun orsamentál kona-ba OJE kada tinan iha livru ualu (8), kompostu hosi livru 1 (panorama orsamentál) ho lian Tétun, livru 2 (planu anuál) ho lian portugés, livru 3A (fundu infraestrutura) ho lian portugés, livru 3B (munisípiu sira) ho lian Tétun, luvru 3C (RAEOA/ZEESM) ho lian Tétun, livru 4AB (rúbrika orsamentál) ho lian portugés, livru 5 (parseru dezenvolvimentu) ho lian portugés no livru 6 (fundu espesiál-FDCH) ho lian portugés.

Maske livru balun ho lian Tétun, maibé dekretu ezekusaun Governu hakerek ho lian portugés, entaun Xefe Estadu husu parte ezekutivu promove lian Tétun nune’e implementadór sira intende ho didi’ak.

“Dekretu hosi Governu kona-ba ezekusaun Orsamentu Jerál Estadu  tenke klaru liu ba ema sira-ne’ebé implementa, hakerek ho lian Tétun,” Xefe Estadu fó hanoin ba parte ezekutivu.

Entretantu, Totál Orsamentu Jerál Estadu (OJE) 2021 ne’ebé aprova hosi Parlamentu Nasionál no promulga hosi Prezidente Repúblika ho montante biliaun $1.895 no aumenta ho millaun $135 liuhosi Orsamentu Retifikativu sa’e ba biliaun $2.1 ($2,030,299,999.98).

Nune’e, koloka millaun $229,7 ba saláriu no vensimentu, millaun $573,4 ba bens no servisu, millaun $716,0 ba transferénsia públika, millaun $55,1 ba kapitál menór no millaun $358,4 ba kapitál dezenvolvimentu. Nune’e aumenta tán ho millaun $223,8 sa’e ba billaun $2.1.

Hosi montante orsamentu biliaun $2.1 ho taxa ezekusaun to’o loron kinta (19/05) ne’e atinje 25.1%, ne’ebé Agência TATOLI asesu liuhosi portál transparénsia orsamentál Ministériu Finansa nian.

Hosi $2,030,299,999.98 (biliaun $2.1) ne’e ho taxa ezekusaun 25.1% ne’e kompostu hosi Kompromisu sira $134,742,806.25 (millaun $135-resin), obrigasaun sira $66,574,613.15 (millaun $33-resin), atuál $442,467,549.29 (millaun $442-resin), no hela saldu $1,386,515,031.29 (biliaun $1,3-resin).

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here