DILI, 20 maiu 2021 (TATOLI)—Prezidente Repúblika, Francisco Lú Olo, hateten realidade iha Timor-Leste sistema edukasaun seidauk preparadu hodi garante labarik sira asesu programa “Eskola Hosi Uma” (Tele-Eskola) ne’ebé utiliza inertnet ka televisaun, maibé Governu presiza halo esforsu hodi bele garante labarik sira bele kontinua sira-nia prosesu aprendizajén iha uma.
Notísia Relevante: MEJD lansa programa eskola ba uma no tele-eskola
“Ita-nia oan sira fulan hira ona labele ba eskola. Governu halo esforsu boot ida hodi garante katak labarik sira bele kontinua sira-nia prosesu aprendizajén iha uma. Maibé, realidade hatudu katak ita-nia sistema edukasaun seidauk preparadu hodi garante katak alunu sira iha territóriu laran tomak iha asesu ba materiál no ba konteúdu aprendizajén, liuhusi internet ka televizaun,” Prezidente Repúblika hato’o mensajen Estadu nian iha selebrasaun loron restaurasaun independénsia ba dala-XIX, iha Palásiu Prezidensiál Nicolau Lobato, Bairru Pite, Dili, kinta ne’e.
Prezidente Lú Olo hatutan, la’ós estudante sira de’it mak la preparadu maibé manorin sira mós la preparadu hodi uza teknolojia ne’ebé disponível hodi kontinua hanorin iha situasaun pandemia COVID-19 nia-laran.
Tanba ne’e, urjentemente Xefe Governu husu ba Governu Timor-Leste liuliu Minsitériu Edukasaun Juventude no Desportu (MEJD) hanoin fila-fali oinsá atu hadi’ak sistema edukasaun iha rai-laran hodi harii eskola moderna ho teknolojia foun.
Tempu ona, Prezidente Repúblika hateten, atu harii eskola ida moderna ho kondisaun atuál hodi forma profesór sira ho kapasidade atu uza teknolojia foun sira, hodi prosesu aprendizájen ba estudante sira sira bele la’o ho kualidade di’ak, ho kurríkulu ida atualizadu no adekuadu hodi prepara futuru nasaun-nian ho garantia no sustentabilidade.
“Edukasaun ho kualidade mak sei garante futuru dignu ida ba ita-nia país,” Prezidente Repúblika Farncisco Guterres Lú Olo hateten.
Notísia Relevante: Eskola-sira prepara rezumu matéria fahe ba estudante-sira
Jornalista: Osória Marques
Editór: Cancio Ximenes
