Ilustrasaun COVID-19/Espesial.

DILI, 20 maiu 2021 (TATOLI)—Prezidente Repúblika, Francisco Guterres Lú Olo, konvida Timor-oan sira hotu atu halo reflesaun kona-ba perkursu nu’udar povu no nasaun ida liuliu kona-ba pandemia COVID-19 no dezastre naturál (kalamidade klimatika) ne’ebé akontese iha fulan abríl liubá ne’e.

Notísia Relevante: COVID-19: pozitivu 172, rekoperadu 76 no ativu 2.398

“Maske ohin loron ita hasoru hela pandemia COVID-19 nian, ne’ebé da’et ona iha munisípiu hotu-hotu no iha RAEOA, ha’u hakarak konvida sidadun hotu atu halo reflesaun ida kona-ba ita-nia perkursu ka dalan ne’ebé ita la’o ona, nu’udar povu no nasaun ida,” Prezidente Repúblika hato’o mensajen Estadu nian liuhosi selebrasaun loron restaurasaun independénsia ba dala-XIX, iha Palásiu Prezidensiál Nicolau Lobato, Bairru Pite, Dili, kinta ne’e.

Prezidente Repúblika, Francisco Guterres Lú Olo. Imajen/ Egas Cristovao

Prezidente repúblika hatutan, iha ámbitu ukun rasik aan ne’e Timor-Leste hasoru dezafiu boot ida ne’ebé lori timor-oan sira terus tanba pandemia COVID-19 ne’ebé afeta mundu tomak no da’et lalais lós hosi ema ba ema no hosi país ida ba país seluk, ne’ebé hahú iha fulan Dezembru tinan 2019 no hamate ona ema ema liu tokon atus ida neen nulu no to’o ohin loron hasai ona ema nia vida, liu tokon tolu.

Iha Timor-Leste, Governu halo ona esforsu barak hodi evita vírus korona da’et ba sidadaun sira maibé Timkr-Leste tama on aba kategoria transmisaun komunitária liuliu iha Munisípiu Dili, ne’ebé halo Timor-oan barak mak hetan poszitivu.

“Ohin loron, ita tama ona ba kategoria transmisaun komunitária liuliu iha munisípiu Díli. Ema ne’ebé hetan pozitivu ho vírus COVID-19 nian to’ o ona 4.949 ne’ebé sura hosi 21 marsu 2020 to’o 19 maiu 2021. Kazu ativu iha 19 maiu 2021 hamutuk hotu 2.302.  Ita lakon ita-nia belun na’in-11 ne’ebé mate ho COVID-19,” Lú Olo hateten. 

Husi ezemplu ne’ebé ita asiste iha País seluk, iha ita-nia rejiaun no iha kontinente hotu-hotu, ita tenke iha konxiénsia katak Covid-19 sei la lakon iha tempu badak. Nune’e, ita tenke adapta no aprende moris ho situasaun ida ne’e.

Aleinde ne’e, Xefe Estadu ne’e hateten, Timor-oan sira tenke halo reflesaun mós ba dezastre naturál ne’ebé akontese iha loron 04 fulan-abríl, ne’ebé udan boot rezulta inundasaun iha munisípiu Dili no mós iha Munisípiu Manatuto, Baucau, Viqueque, Covalima no seluk ne’ebé estraga infraestrutura bázika públiku no ema barak mak mate,

“Ho inundasaun no ho forsa bee nian infraestrutura barak mak monu no estraga totál, hanesan ema-nia uma, edifísiu públiku no infraestrutura bázika públika barak hanesan dalan no ponte sira sai aat. Ema barak lakon sira nia uma no sasán tomak no to’o ohin loron seidauk iha uma di’ak ida, hodi fila-fali ba sira-nia uma. Triste liután, ita-nia ema mate no lakon, hamutuk na’in-41,” nia dehan.

Dezafiu sira hanesan dezafíu polítiku, sosiál, pandemia COVID-19, no dezastre naturál ne’ebé Timor-Leste enfrenta ne’e labele trava ka impede Timor-oan sira hodi nafatin kontinua hatutan erói no eroína sira-nia mehi hodi harii sosiedade ida-ne’ebé livre, demokrátika no justa, no sosiedade ida-ne’ebé sidadaun sira moris ho haksolok.

“Iha adversidade nia laran mak ita tenke matenek hodi analize no diskute dalan ne’ebé ita la’o hela, identika no asume sala ne’ebé ita halo ona no ho responsabilidade buka meius atu hadi’ak buat ne’ebé tenke hadi’ak no halo foun buat ne’ebé importante, hodi dezenvolvimentu bele lao nafatin ho kualidade no sustentabilidade.  Tempu agora no ba oin sei nafatin dezafia ita-nia kapasidade hanoin no halo ho di’ak. Hamutuk ita bele hadi’ak no haburas,” nia hateten.

Notísia Relevante: Governu finaliza apoiu umanitáriu ba família afetadu 33.375

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here