Prezidente Repúblika,Francisco Guterres Lú Olo. Imajen Tatoli/António Gonçalves.

DILI, 20 maiu 2021 (TATOLI)—Prezidente Repúblika (PR), Francisco Guterres Lú Olo, husu ba Governu liuliu Komisaun Nasionál Eleisaun (CNE, sigla portugés) no Sekretaratu Tékniku Administrasaun Estatál (STAE, sigl, portugés) atu halo preparasaun ba eleisaun prezidensiál, tanba iha 2022 ne’e Timor-Leste sei realiza eleisaun. 

Francisco Guterres Lú Olo hatutan, maske ho situasaun pandemia COVID-19 ne’ebé lori Timor-Leste hasoru dezafiu barak, maibé nia husu ba Governu atu prepara eleisaun prezidensiál ida-ne’ebé livre no justu, atu nune’e sidadaun votante sira bele partisipa másimu.

Notísia Relevante: 2021: CNE halo preparasaun ba aktu eleitorál, ba eleisaun prezidensiál 2022

“Iha tinan oin mai, ita sei iha eleisaun Prezidensiál. Ho situasaun pandemia COVID-19, ita sei hasoru dezafiu barak hodi prepara eleisaun Prezidensiál ida-ne’ebé livre no justa. Tanba ida-ne’e, ha’u husu ba Governu, STAE, CNE no instituisaun relevante sira hodi hahú halo preparasaun iha tempu badak,” Prezidente Repúblika hato’o mensajen Estadu nian liuhosi selebrasaun loron restaurasaun independénsia ba dala-XIX, iha Palásiu Prezidensiál Nicolau Lobato, Bairru Pite, Dili, kinta ne’e.

Xefe Estadu ne’e hateten, iha prosesu preparasaunba ba eleisaun prezidensiál ne’e presiza Timor-oan sira liuliu Governu nia kompromisu no empeñu mak sei garante prosesu eleisaun ida ho partisipasaun másima hosi sidadaun votante sira hotu ho dalan seguru.

Eleisaun Prezidensial iha tinan oin (2022) ne’e, nu’udar eleisaun daruak ne’ebé organiza rasik hosi Timor-oan sira.

Tanba, iha Eleisaun Prezidensiál 20 Marsu 2017 liubá ne’e, nu’udar eleisaun dahuluk ne’ebé organiza hosi Timor-oan rasik hafoin eleisaun sira antes 2012, 2007, 2002 no 2001 ne’ebé hetan suporta hosi Nasaun Unida no organizasaun internasional sira seluk

Iha eleisaun prezidensiál ne’e, iha progresu boot tanba Eleisaun ba Prezidente Repúblika konsege realiza mós iha rai-li’ur ne’ebé hala’o iha Sidney no Darwin–Australia no mós iha Portugal.

Kandidatu sira iha Eleisaun ba Prezidente Repúblika 2017 hamutuk kandidatu na’in-ualu (8) no hosi kandidatu sira-ne’e kandidatu feto na’in-ida (1) no mane na’in na’in-hitu (7) ho sira-nia númeru sorteiu sira-ne’ebé kompostu hosi;

(1) Antonio Maher Lopes “Fatuk Mutin”, (2) Francisco Guterres “Lú Olo”, (3) Amorin Viera (4), Jose Neves “Sama Larua”, (5) Jose Luis Guterres “Lugu” (6) Maria Angela Freitas (7) Luis Alves Tilman “Mauhunu”, no (8) Antonio da Conceição “Kalohan”.

Kandidatu na’in-ne’en (6) hanesan kandidatu independente no kandidatu na’in-rua (2) hosi partidu nian mak kandidatu númeru sorteiu rua (2) hosi Partidu Frente Revolucionario Timor-Leste Independente (FRETILIN) no kandidatu númeru sorteiu ualu (8) hosi Partidu Demokratiku (PD).

Rezultadu votasaun iha eleisaun prezidensiál 2017 ne’e, 71.2% hosi eleitór rejistu na’in-743,150 mai atu vota iha loron 20 Marsu, no 97.8% vota sira-ne’e mak válidu. Kandidadtu Prezidente númeru sorteiu rua (2), Francisco Guterres (Lu-Olo) manán ho 57%, entaun la presiza segunda ronda no hetan tomada de posse iha 20 maiu 2017.

Notísia Relevante: Alterasaun Lei Eleitorál ba PR fasilita votante iha ámbitu COVID-19

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here