Fasilidade saneamentu ba vítima inundasaun iha Masin Lidun. Imajen Tatoli/Felicidade Ximenes.

DILI, 20 maiu 2021 (TATOLI)—Ministériu Saúde (MS), hamutuk ho Cruz Vermelha Timor Leste (CVTL), halo konstrusaun ba fasilidade saneamentu (haris-fatin), ba vítima inundasaun ne’ebé refujia iha bairru Masin Lidun I (foho-hun), aldeia 12 outubru, Tasi-tolu, suku Comoro, postu administrativu Dom Aleixo, munisípiu Dili, hamutuk uma-kain 45.

Ministra Saúde, Odete Maria Freitas Belo, hateten, fasilidade saneamentu (haris-fatin) ne’ebé konstrui kompostu hosi kuartu tolu, no husu ba família-sira atu uza ho didi’ak no kuidadu, nune’e mantein hijiéne.

Notísia relevante:SEPS harii tenda ba família 47 iha Masin Lidun

‘’Husu ba família-sira atu hamoos haris-fatin hirak-ne’e, nune’e bele asegura nafatin ita-nia saúde, liuliu labarik-sira,’’ Odete Maria Freitas Belo, hateten bainhira observa direta fasilidade sanitária.

Governante ne’e husu ba família-sira, bainhira iha sasán ruma ne’ebé aat, labele tauk atu hateten, no  presija informa lalais ba CVTL no MS, atu bele troka sasán hirak-ne’e.

Iha fatin hanesan, Xefe Departamentu Saúde, CVTL, João Pinto Soares, hateten fasilidade saúde hirak-ne’e importante tebes ba família afetadu-sira, husu atu bele uza ho kuidadu.

“Ita halo konstrusaun ba haris-fatin, nune’e, família-sira bele uza hodi fase liman, haris, fase roupa, no so’e bee boot, maibé tenke kuidadu atu fatin ne’e moos nafatin,” nia husu.

Nune’e mós koordenadór refujiadu, Afonso José, agradese ba MS no CVTL tanba fasilita ona fasilidade saneamentu iha fatin ne’e.

“Ami agardese tanba agora ami bele uza ona fasilidade hirak-ne’e kompleta kedan ho bee moos. Antes ne’e ami hasoru difikuldade boot tanba laiha nesesidade sanitária,” nia agradese.

Koordenadór ne’e mós promete sei halo kontrolu másimu ba utilizasaun fasilidade hirak-ne’e, liuliu sei fó hanoin nafatin ba família sira atu mantein ijiéne.

Fasilidade saneamentu ne’e komunidade rasik mak ajuda ho voluntariamente ba konstrusaun, no instala bee moos.

Fasilidade saneamentu ne’e, konstrui tanba hetan apoiu hosi CVTL hamutuk $900 no hosi MS $1.800 ho totál $2.700.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here