Estudante Sekundariu 30 Agostu, Comoro, Dili. Imajen Tatoli/Antonio Goncalves

DILI, 20 maiu 2021 (TATOLI) – Diretór Ezekutivu Timor-Leste Coalition for Education (TLCE), José Monteiro, hateten 80% Timoroan  hosi idade  4 to’o 17 ba leten iha Timor-Leste asesu ona edukasaun nivel pre-eskolár to’o nivel ensinu superiór.

Progresu hosi atinjimentu persentajen ne’e, tuir TLCE nia haree tanba esforsu Governu Timor-Leste nian hodi loke espasu ba Timoroan ho idade produtivu asesu ba edukasaun liuhosi planu no programa harii eskola iha territóriu nasionál hodi lori edukasaun hakbesik ba povu.

Diretór Ezekutivu TLCE, José Monteiro. Imajen Tatoli/Tomé Amado

Diretór Ezekutivu TLCE, José Monteiro esplika, razaun forte ne’ebé TLCE públika hosi atinjimentu 80% labarik ka Timoroan ho idade produtivu asesu ona ba edukasaun ne’e bazeia bá dadus sensu populasaun 2015 no dadus hosi númeru Education Management Information Systems (EMIS) kada estudante.

“Ami la inventa dadus no la ko’alia buat ida sein faktu. Buat ne’ebé ami fo sai bazeia ba evidénsia ne’ebé Governu halo ba populasaun hosi sensu 2015 inklui númeru EMIS kada estudante,” diretór José Monteiro hateten ba Agência Tatoli iha ninia servisu fatin iha Dili, kinta ne’e.

Nia informa maske labarik no joven produtivu 80% mak asesu ona edukasaun, ne’e mós seidauk sai sasukat ida atu kompara edukasaun nasionál ho edukasaun iha rejionál no internasionál.

Nia subliña katak edukasaun nasionál atu iha kualidade tenke garante ho infraestrutura, formasaun ba profesór-sira tenke másimu, prosesu ensinu aprendizajen tenke garante ho kurríkulu ne’ebé di’ak, labarik-sira tenke iha kapasidade lee di’ak no komprende númeru ho valor boot.

“Realidade TL seidauk atinje nivel edukasaun ida tuir padraun sira ne’e tanba autór dezenvolvimentu sira hanesan Governu, Parlamentu Nasionál inklui sosiedade sivíl no entidade sira seluk seidauk tau prioridade orsamentu jerál estadu kada tinan ho valor boot iha area edukasaun,” nia tenik.

Ho dezafiu sira ne’e, José Monteiro husu ba jerasaun foun sira ne’ebé sei sai autór ba dezenvolvimentu iha futuru atu nafatin haka’as-an. Tanba tempu ona atu hatudu-an ho koñesimentu kle’an iha siénsia. Tan ne’e buka kapasita-an nafatin atu sai joven ida kualidade, nakonu ho abilidade atu lori nasaun ne’e kontinua lao ba oin.

Jornalista       : Tomé Amado

Editór            : Francisco Simões

 

HAKEREK NO HATÁN

Please enter your comment!
Please enter your name here