Aviaun Qantas. Imajen TATOLI/António Gonçalves

DILI, 19 maiu 2021 (TATOLI)–Traballadór timor-oan na’in-30 ne’ebé preparadu arranka bá serbisu iha Austrália liuhosi programa Pacific Labour Scheme (PLS), seidauk bele halo viajen tanba situasaun COVID-19.

“Ita pendente 30-resin seidauk lori bá Austrália tanba ita sei iha situasaun Estadu Emérjensia no Serka Sanitária, nune’e mós Governu Austrália konsidera ita (kapitál Dili) zona mean ba trasmisaun lokál COVID-19 maka sira seidauk autoriza ita tama,” Adidu traballadór Austrália hosi Sekretaria Estadu Formasaun Profisionál no Empregu (SEFOPE), Tomas de Araújo, informa iha Aeroportu Internasionál Prezidente Nicolau Lobato, Comoro, Dili, kinta ne’e. 

Enkuantu, traballadór timor-oan hosi programa traballadór sazonál ne’ebé daudaun Governu liuhosi SEFOPE prepara atu bá Austrália no liu ona teste hamutuk 400 resin.

Iha loron hanesan, traballadór timor-oan na’in-lima tenke filafali ho Aviaun Qantas tanba kontratu ramata ona. 

“Traballadór sira ohin mai ne’e na’in-lima, kompostu hosi feto rua no mane tolu, ida hosi programa Pacific Labour Scheme no haat seluk hosi programa traballadór sazonál, sira mai tanba razaun kontratu ramata,” nia akresenta. 

Tuir Adidu, traballadór hosi programa PLS nia kontratu tinan-ida ramata no traballadór sazonál tinan-ida no fulan-neen, ne’ebé maioria traballadór na’in-lima serbisu iha Queenland, Austrália.

Traballadór ne’ebé tama ona ba lista repatriasaun hamutuk 110, ne’ebé sei fila iha fulan-juñu tinan ne’e.

Entretantu, Austrália no Timor-Leste iha ona akordu servisu aéreu (Air Service Agreement), ne’ebé fasilita movimentu via área entre nasaun rua di’ak liután.

Hafoin halo akordu ne’e, Aviaun Qantas sei halo operasaun hosi Austrália mai Timor-Leste semana-rua dala-ida.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here