Logotipu Organizasaun Mundiál Komérsiu. Imajen/Espesiál

DILI, 19 maiu 2021 (TATOLI)–Ministru Koordenadór Asuntu Ekonómiku (MKAE), Joaquim Amaral, halo aprezentasaun ida iha reuniaun Konsellu Ministru (KM) kona-ba pontu situasaun prosesu adezaun Timor-Leste ba Organizasaun Mundiál Komérsiu (OMK).

“Daudaun ne’e, Timor-Leste iha estatutu hanesan país observadór no iha hela prosesu negosiasaun adezaun ba OMK, atubele hamutuk ho país 164 ne’ebé maka hola parte ona iha organizasaun,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun ezekutivu iha salaun Ministériu Finansa (MF), Aitarak-laran.

OMK hanesan organizasaun ne’ebé regula regra komérsiu entre país sira, ho objetivu atu garante katak atividade komersiál hotu la’o ho forma fasil, livre, previzível no posível.

Notísia relevante: MKAE lidera negosiasaun adezaun Timor-Leste ba OMK

Governu Timor-Leste, liuhosi ekipa negosiasaun ne’ebé lidera hosi Ministru Joaquim Amaral prepara hela atu partisipa iha sorumutuk daruak negosiasaun altu nível hosi grupu traballu OMK ne’ebé sei realiza iha fulan jullu 2021.

Iha loron 13 juñu 2017, Governu liuhosi reuniaun KM aprova memorandu rejime komérsiu esternu vijente iha Timor-Leste.

Memorandu ne’e, hanesan desizaun ida atu fó biban ba MKAE lori dokumentu ba OMK atu hahú halo negosiasaun ho organizasaun mundiál ne’e.

Tanba Timor-Leste hanesan observadór iha OMK maka iha ona grupu traballu hanesan komité traballu atu halo negosiasaun.

Iha grupu traballu ne’e, Timor-Leste husu Portugál atu prezide tanba sira iha esperiénsia barak kona-ba kestaun ne’e no fó apoiu bainhira halo negosiasaun atu adere.

Nune’e, bainhira halo negosiasaun presiza lori memorandu free trade agreement kona-ba rejime komérsiu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here