Sentru izolamentu Vera Cruz. Imajen Tatoli/Egas Cristóvão.

DILI, 19 maiu 2021 (TATOLI)—Sala Situasaun, Sentru Integradu Jestaun Krize (SIJK), rejista tan kazu óbitu na’in-ida, iha sala izolamentu Vera Cruz, tanba sofre iis boot.

“Totál óbitu ohin-nian, na’in ida, Timoroan mane ho idade 60. Matebian moras durante semana ida iha uma, ba Ospitál Nasionál Guido Valadares (HNGV) iha 18 maiu tanba iis-boot makás, diagnostikadu ho sindroma insufisiénsia respiratória aguda (SIRA), ka susar ka difísil atu dada-iis no deteta mós SARS-CoV2 ho Cycle Threshold (CT) N gene 26,6, E gene 25,1,” Koordenadór Forsa-Tarefa ba Prevensaun no Mitigasaun, Rui Maria de Araújo, hateten liu hosi komunikadu, kuarta ne’e.

Notísia relevante:COVID-19: pozitivu 178, rekoperadu 119 no ativu 2.302

Médiku ne’e konta tuir mós katak, matebian iha istória ho moras Tuberkuloze no mós diabetes ne’ebé la kontroladu.

Tuir kronolojia, hahú kedan iha 18 maiu, halo tratamentu iha fatin izolamentu Vera Cruz ho oksijéniu liu hosi CPAP ka Continuous Positive Airway Pressure iha ICU, maibé ohin tuku 09:45 otl, iis-kotu, tanba fallansu respiratóriu ka respiratoric failure ho multiple organ failure.

Família koordena ona ho ekipa Sala Situasaun, Sentru Integradu Jestaun Krize, atu hala’o funerál tuir protokolu, ne’ebé  mak estabelese ona.

Ohin, SIJK, rejista kazu pozitivu COVID-19 foun hamutuk 178, rekoperadu 119 no kazu ativu 2.302.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here