Ilustrasaun Informasaun hoax nebe lansa iha Facebook relasiona ho COVID-19. Imajen/Espesiál

DILI, 19 maiu 2021 (TATOLI)–Sekretaria Estadu Komunikasaun Sosial (SEKOMS) lansa plataforma dijitál ho baze dadus hodi halibur informasaun falsa/hoax ne’ebé lansa iha rede sosiál hanesan Facebook no seluk tan hodi halo arkiva.

“Ohin ita konsege lansa plataforma dijitál dahuluk ho intensaun hakarak halibur informasaun falsu ka hoax ne’ebé mak lansa loron-loron iha rede sosiál no sai konsumu públiku,” Sekretáriu Estadu Komunikasaun Sosiál, Merício Juvinal dos Reis ‘Akara’ informa iha Palásiu Governu, kinta ne’e.

Nune’e, kada fulan-tolu SEKOMS sei atualiza dadus estatístika relasiona ho informasaun falsa ne’ebé espalla iha rede sosiál, hodi bele fasilita entidade relavante sai hanesan referénsia ida.

Nia esplika, sistema ne’e funsiona liuhosi ekipa SEKOMS ne’ebé tau-matan ba kualker informasaun ne’ebé konsidera la loos no espalla iha rede sosiál, sei halibur iha plataforma ne’e, nune’e bele ajuda Governu halo planu edukasaun sívika ba sidadaun.

Tuir governante ne’e, inisiativa ne’e mosu tanba nota katak daudaun iha fenómenu ne’ebé ema gosta liu informasaun falsu ne’ebé lansa iha rede sosiál no fahe tutan, hodi domina liu notísia loos ne’ebé fó sai hosi mídia sira hosi fontes kredível.

“Atu promove edukasaun sívika, ita presiza baze dadus atu públiku bele hatene katak kategoria informasaun la loos no la bele fiar, maibé fiar de’it mak notísia hosi fontes kredível hosi mídia hanesan RTTL, Agência TATOLI, Timor Post, TVE, GMN no seluk tan,” nia subliña.

Tanba ne’e, programa ne’e sei kontinua bainhira grupu ka individu balun ne’ebé kontinua espalla informasaun falsu ho intensaun atu halo pániku públiku no manipula ema-nia ideia ne’ebé loos.

“Intensaun mak atu halo movimentu edukasaun sívika, tanba ne’e ekipa téknika sira hosi SEKOMS prepara ona no sei tau-matan ba sé de’it mak lansa bebeik, iha gráfiku ne’e sei hatudu risku mean,” nia hatutan.

Aleinde ne’e, Sekretáriu Estadu dehan, SEKOMS  kontinua programa edukasaun sívika hamutuk ho mídia atu promove notísia ka informasaun kredível .

“Plataforma seluk ne’ebé SEKOMS iha mak kona-ba notísia di’ak hodi fasilita no promove ba mundu kona-ba Timor-Leste nia potensialidade, nune’e ema bele hatene,” nia tenik.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here