Arsebispu Arkidioseze Metropolitana Dili, Mgr. Virgílio do Carmo Silva, SDB. Imajen Tatoli/Arminda Fonseca

DILI, 19 maiu 2021 (TATOLI)-Arsebispu Arkidioseze Metropolitana Dili, Mgr. Virgílio do Carmo Silva, SDB, husu ba povu Timor-Leste hotu atu foti matan hateke ba leten agradese ba Maromak ne’ebé nunka abandona povu ida-ne’e iha nia istória luta ba libertasaun nasionál.

Notísia Relevante : Restaurasaun Independénsia da-19, MAPKOMS enkoraja tau forsa hamutuk hakat difikuldade

Dom Virgílio do Carmo Silva, hateten lia hirak liuhosi konferénsia imprensa iha Cámara Eclesiástica Lecidere, Dili, kuarta ne’e, hodi hato’o nia mensajen ba povu Timor-Leste ne’ebé sei komemora loron restaurasaun independénsia da-19 (20 maiu 2002- 20 maiu 2021).

“Dala ida tan povu Timor-Leste, povu asuwa’in, povu fiar nain komemora aniversáriu restaurasaun independénsia ba dala-19, ha’u-nia parabens ba povu doben hotu, komemorasaun loron restaurasaun independénsia ida-ne’e nu’udár loron  ida atu ita foti matan hateke ba leten agradese ba Maromak ne’ebé nunka abandona povu ida-ne’e iha nia istória no luta ba nia libertasaun restaurasaun  independénsia Repúblika Demokrátika Timor-Leste (RDTL),” Dom Virgílio do Carmo da Silva, SDB hateten.

Komemorasaun loron restaurasaun independénsia aleinde agradese ba Maromak,  Arsebispu  Arkidioseze Metropolitana Dili ne’e, hatutan  loron ida-ne’e mós nu’udár loron ida  hateke ba kotuk atu agradese ba timor-oan hotu ne’ebé kontribui ona ba Timor nia ukun rasik-an, ba sira ne’ebé mate no liu-liu sira ne’ebé nia naran to’o oras ne’e la tama iha lista no ema la temi atu Nai Maromak haraik ba sira rahun di’ak Lalehan nian.

“Loron ida ne’e mós atu povu asuwa’in no fiar nain, kaer liman hamutuk hateke ba oin no hamutuk hakat ba oin, husik ida-idak nia interese hasoru krize ne’ebé iha ita-nia oin. Komemora loron restaurasaun independénsia ba dala-19 iha situasaun ida difisil, konvida povu asuwa’in no fiar nain hotu atu kaer liman hamutuk no husu ba ita-nia-an saida mak ita tenke halo atu ita sai hosi susar ida ne’e,” nia hateten.

Nia hatutan, liu tiha akontesimentu 04  abríl 2021 (dezastre naturál), saida mak hotu-hotu haree, la’ós timor-oan rasik, maibé hosi rai-laran nune’e mós rai li’ur ne’ebé la sente hakmatek bainhira haree nia maluk timor-oan ne’ebé iha susar laran, situasaun ne’e obriga timor-oan barak la ta’uk atu hakat ba sentru akollamentu sira, nune’e mós la moe atu lolo liman, fó tulun maluk sira ne’ebé iha susar-laran.

“Maske ita-nia tulun sira ki’ik-oan, maibé dala ida tan ita hatudu ita-nia solidariedade nu’udár timor-oan, hamutuk mak ita bele halo diferensa ida. Ba jestu ne’e, ha’u nia parabens, maibé seidauk hotu tanba inimigu ne’ebé obriga ita atu luta hamutuk tan hodi halakon  COVID-19, inimigu ida-ne’e presiza timor-oan hotu atu lolo-liman ba malu duni, maibé sé ita balun la kohi hola parte iha Iuta ida ne’e ita mak sei agonia nafatin,” Dom Virgílio hateten.

Nia afirma, loron restaurasaun independénsia nian ba dala-19 ne’e úniku, maske la iha barullu barak la signifika atu husik liu de’it, maibé situasaun ne’e duni mak obriga hotu-hotu atu hafoun ida-idak nia espíritu nasionalizmu.

“La’ós hein de’it saida mak Estadu no Governu sei halo mai ha’u, maibé saida mak ha’u nu’udár timor-oan  tenke kontribui duni ba rai ida-ne’e nia di’ak, liu-liu iha situasaun COVID-19 nian ne’e. Mai ita dala ida tan saran rai ida ne’e ba Maromak nia mizerikórdia iha ita-nia preparasaun ba festa Espíritu Santu nian, no liuhosi interasaun  Nain Feto Imakulada nian atu timor-oan hatene haraik-an ba malu, perdua-malu, simu-malu no hamutuk buka atu sai hosi susar ne’ebé iha ita nia oin,” Dom Virgílio hateten.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here