Reuniaun Konsellu Ministru, iha salaun Ministériu Finansa, Aitarak-laran, kuarta (19/05). Imajen TATOLI/Egas Cristóvão

DILI, 19 maiu 2021 (TATOLI)—Durante reuniaun Konsellu Ministru (KM), membru Governu sira analiza aprezentasaun hosi Sala Situasaun-Sentru Intagradu Jestaun Krize (SS-CIGC, sigla portugés) kona-ba pontu situasaun epidemiolójika país nian.

Nune’e, hafoin rona aprezentasaun, ezekutivu sira delibera hodi propoin ba Prezidente Repúblika, Francisco Guterres ‘Lú Olo’, atu renova Estadu Emerjénsia (EE) ba loron 30 tan.

“Desizaun ne’e tanba haree ba evolusaun hosi situasaun epidemiolójika no proliferasaun ba kazu sira rejistadu kontájiu COVID-19,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun ezekutivu iha salaun Ministériu Finansa (MF), Aitarak-laran, kuarta ne’e.

Tuir Portavóz Governu, desizaun ne’e tanba ezekutivu atu evita no neutraliza risku propagasaun COVID-19, nune’e bele proteje saúde públika no iha kbiit atu hatán ba Sistema Nasionál Saúde

“Governu propoin ba Xefe Estadu katak, ho renovasaun Estadu Emerjénsia ne’e permite atu suspende ka limita direitu no garantia fundamentál balun,” nia akresenta.

Entretantu, Timor-Leste rejista ona kazu akumuladu totál hamutuk 4.765 dezde inísiu pandemia iha marsu 2020.

Kazu ativu daudaun ne’e hamutuk 2.238, kompostu hosi munisípiu Dili hamutuk 1.851, Baucau 128, Covalima 101, no Viqueque 75.

To’o kuarta (19/05) ne’e, ema hamutuk 28.600 (reprezenta 3,3%) simu ona doze dahuluk vasina kontra COVID-19 no iha faze daruak dezde loron 10 maiu, ema hamutuk 20.094 maka simu ona vasina.

Daudaun ne’e EE da-XIII ne’ebé vigora hela, abranje ba teritóriu nasionál tomak entre tuku 00:00 loron 03 maiu to’o tuku 23:59 loron 01 juñu 2021.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here