Elikópteru ne’ebé Governu Austrália ho kompañia petrolífeira Santos aluga hosi kompañia aviasaun MCDERMOTT Austrália, tula hela apoiu umanitáriu ba Covalima. Imajen/Média SEPS.

DILI, 19 maiu 2021 (TATOLI)—Governu liu hosi Ministériu Interiór (MI) no Sekretáriu Estadu Protesaun Sivíl (SEPS), agradese ba Governu Austrália ho kompañia petróleu Santos ne’ebé aluga ona elikópteru McDERMOTT Aviation Austrália, durante fulan ida, hodi halo mobilizasaun apoiu umanitáriu iha área remota territóriu Timor-Leste (TL), durante fulan ida.

Diretór Jerál SEPS, Superintendente, Ismael Babo, reprezenta Vise Ministru Interiór, hateten durante  operasaun elikópteru ne’e tulun tebes serbisu SEPS, hodi mobiliza apoiu umanitáriu iha área remota sira ne’ebé difísil tebes atu asesu ba estrada.

Notísia relevante:Austrália ho Santos apoiu elikópteru hodi reforsa ajudu umanitáriu

Tanba ne’e, Governu TL merese atu hato’o agradesimentu ba apoiu hosi Governu Austrália no kompañia Santos, liuliu ba pilotu sira, hosi tulun povu TL durante situasaun kalamidade.

“Esforsu operasaun apoiu umanitáriu hosi aerea ba fatin-sira ne’ebé labele asessu estrada, no tama iha kategiria urjente, konsege atende ho lalais,’’ Ismael Babo hateten, iha serimónia enseramentu ne’ebé hala’o iha Aeroportu Internasionál Prezidente Nicolau Lobato, kuarta ne’e.

Nia hatutan, operasaun hosi elikópteru ne’e remata ona, maibé la’ós inísiu maibé iha futuru bele kontinua apoiu, tamba dezastre naturál mosu la espera.

Iha serimónia enseramentu ne’e mós Governu entrega sertifikadu apresiasaun ba pesoál na’in-haat kompostu hosi pilotu Tony Brewn, Luke Enkera, ho Aircraft Mechanics no Air Crew Officer Nathan Pollard no Nick Mckee no mós pilotu Timoroan na’in rua Tenente, Alex Verdiál hosi FALINTIL Forsa Defeza Timor-Leste (FF-DTL), Inspetór Brígida Gomes Pereira, hosi Polísia Nasionál Timor-Leste (PNTL), no Tenete Mario Doutel Pereira ne’ebe serbisu iha Nucleo Aerea.

Durante fulan ida, ne’ebé remata iha kinta (20/05/21), operasaun elikópteru konsege transporta apoiu umanitáriu ba postu administrativu Ataúro, postu administrativu Laklubar, postu administrativu Lekidoe no Remexio, kosege transporta mós ba parte munisípiu Baucau, munisípiu Lautem, munisípiu ManuFahi, munisipiu Covalima, munisipiu Ainaro, munisípiu Ermera no Rejiaun Administrativa Espesiál Oe-Cusse Ambeno (RAEOA).

Elikópteru ne’e, aluga ho montante orsamentu hamutuk $921.782, ne’ebé kompañia Santos kontribui $250.000 no restu hosi Governu Austrália.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here