Ministru Administrasaun Estatál, Miguel Pereira de Carvalho. Imajen TATOLI/Egas Cristovão

DILI, 19 maiu 2021 (TATOLI)—Ministru Administrasaun Estatál (MAE), Miguel Pereira de Carvalho, apela ba sidadaun hotu atu hasa’e bandeira iha ida-idak ninia iha selebrasaun loron Restaurasaun Independénsia Timor-Leste iha loron maiu.

“Ita hotu hasa’e Bandeira Repúblika Demokratika Timor-Leste (RDTL) hodi fó onra ba loron importante ne’e, liuliu fó onra ba eroi sira ne’ebé fó-an ba mate hodi liberta ita-nia nasaun no kontinua hatutan sira-nia mehi hodi dezenvolve nasaun ne’e,” Ministru  Miguel Pereira, hateten iha edifísiu Ministériu Finansa, Aitarak-laran, kuarta ne’e.

Notísia relevante: Governu kansela selebrasaun loron restaurasaun 20 maiu

Governu deside la halo eventu boot hanesan tinan ne’ebé liu ona tanba situasaun atuál.

“Ita sei la halo eventu seremoniál ba selebrasaun loron Restaurasaun Independénsia Timor-Leste iha loron aban (20/05) tanba COVID-19 no kalamidade públika, tanba haree katak ema labele halibur malu iha fatin ida de’it, maibé selebrasaun loron importante ne’e halo nafatin,” nia akresenta.

Tuir Ministru, selebrasaun loron istóriku ne’e, Prezidente Repúblika, Francisco Guterres ‘Lú Olo’ sei transmite mensajen Estadu ba sidadaun sira.

“Ita-nia Prezidente Repúblika mak sei fó mensajen ba nasaun hodi ema hotu bele akompaña iha loron aban,” nia akresenta.

Jorrnalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here