Vasina AstraZeneca. Imajen Tatoli/António Gonçalves.

DILI, 18 maiu 2021 (TATOLI)—Vasina COVID-19 ho tipu AstraZeneca ne’ebé parte Ministériu Saúde (MS), oferese ba komunidade iha suku Kuluhun, postu administrativu Cristo Rei, munisípiu Dili, prioridade uluk ba aldeia tolu.

Xefe suku Kuluhun, Deus Dado Martins, hateten aldeia tolu ne’ebé prioridade uluk mak hanesan, aldeia  Lao-rai, Toko Baru II no Sorumutu ba Dame, enkuantu aldeia sira seluk sei simu iha faze tuir-mai.

Notísia relevante:Governu agradese Austrália ne’ebé oferese AstraZeneca doses rihun 20

”Ohin, loron dahuluk ita hahú vasina ba aldeia La’o-rai ho abitante hamutuk 124,” Deus Dado Martins, hateten ba jornalista Agência Tatoli via telefónika, tersa ne’e.

Autoridade lokál ne’e informa, abitante iha aldeia ne’e maioria mai rasik hodi simu vasina, tanba antes ne’e Xefe suku hamutuk ho Xefe aldeia, sensibiliza ona iha aldeia sira, no aban sei kontinua vasina ba aldeia rua seluk to’o remata.

Durante ne’e, autoridade lokál kontinua sensibiliza komunidade, serbisu hamutuk ho pesoál saúde-sira, atu nune’e komunidade bele partisipa hotu iha vasina ne’e, nune’e bele kontra peste letál COVID-19.

Suku Kuluhun iha aldeia hitu mak hanesan, Funu Hotu, La’o Rai ka Caregatiro, Loe Laco, Nato, Sorumutu ba Dame, Tane Muto no Toko Baru II  ho totál populasaun hamutuk 9.910.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here