iklan

NASIONÁL, COVID-19, HEADLINE, SAÚDE

Vasina AstraZeneca, risku kiik liu atu infetadu COVID-19

Vasina AstraZeneca, risku kiik liu atu infetadu COVID-19

Diretór ezekutivu ADTL, Cesário da Silva, hamutuk ho membru-sira simu vasina AstraZeneca iha Dili, sábadu (24/04/21). Imajen Tatoli/Egas Cristóvão.

DILI, 18 Maiu 2021 (TATOLI)—Médiku espesialista Kardiolojia, André Monteiro, hateten Governu liu hosi Ministériu Saúde (MS), fó importánsia ba ema hotu-hotu atu simu vasina AstraZeneca, tanba bele proteje ema nia-an, haforsa imunidade, no iha risku kiik liu atu bele infetadu ba COVID-19.

“Bainhira simu ona vasina AstraZeneca, risku kiik liu ba ema atu hetan COVID-19, kompara ho ema ne’ebé seidauk simu. Tanba ne’e, labele tauk atu ba vasina,’’ doutór André Monteiro, hateten ba jornalista Agência Tatoli via telefónika, tersa ne’e.

Notísia relevante:Prazu AstraZeneca doses dahuluk to’o 31 maiu

Médiku espesialista ne’e esplika, bainhira mosu kazu ruma liuliu kona-bá reasaun anaphylactic shock ka alerjia todan depois de simu vasina, ne’e normál hanesan mós vasina sira seluk ne’ebé iha minutu balun de’it lakon ona, no to’o oras-nee seidauk halo ema ruma mate.

“Vasina ne’e mak métodu úniku ne’ebé ita bele halo prevensaun di’ak liu. Dalan seluk hosi vasina ne’e maka ita presija fase-liman, distansiamentu sosiál, uza máskara no seluk tan,’’ nia subliña.

Tuir dadus hosi Ministériu Saúde (MS), to’o 01 maiu 2021, ema ne’ebé simu ona vasina AstraZeneca iha nível nasionál hamutuk 28.678, hosi doses dahuluk.

Dadus ne’e mós hatudu katak, durante vasina iha primeira faze, sira ne’ebé hetan reasaun hamutuk ema na’in-11.

Hosi ema na’in-11 ne’e, na’in-ida moderadu no ida grave, maibé rekopera hikas, no na’in-sia seluk hetan reasaun isin-manas hanesan baibain, no di’ak lalais iha minutu balun.

Jornalista: Felicidade Ximenes

Editór: Cipriano Colo

iklan
iklan

Leave a Reply

iklan
error: Content is protected !!